Freedom QJ League U-17, U-16, U-15: 5-турдың басты сюжеттері

Freedom QJ League U-17

Рахман Аман «Жас Қыранды» алғашқы жеңілісіне ұшыратты

«Ордабасы» өз алаңында «Жас Қыранды» сенімді түрде жеңіп (3:1), турнирлік кестенің үшінші сатысына жайғасты. Үшінші турда «Қайсармен» тең түскен қонақтар биылғы маусымда алғаш рет жеңіліс тапты – Алматыдан тыс жердегі матчтар Талғат Ешжановтың командасына әзірге оңай соқпай тұр.

Шымкенттік ұжымның жеңісіне Рахман Аман зор үлес қосты: ол «Ордабасының» әрбір нәтижелі сәтіне араласып, екі гол соқты және бір ассист жасады. Өткен турда ол «Қайсар» қақпасына да дубль авторы атанған еді. Ол «Каспийге» қарсы ойында өзін қалай көрсетер екен?

«Ертістің» алғашқы жеңісі

Алғашқы төрт матчта жеңіліс тапқан павлодарлық команда үлкен клубтағы ағаларынан үлгі алып, сәтсіздіктер сериясын тоқтатты және «Астананы» қапы қалдырды.

Дегенмен, егер бас турнирде «Ертіс» ірі есеппен (3:0) жеңіске жетсе, U-17 құрамының табысы жалғыз соғылған голдың арқасында келді – матч тағдырын Николай Кузнецов шешті.

«Шахтер» азшылықта қалса да жеңіске жетті

Freedom QJ League U-17 турнирінде әлі бірде-бір жеңіске жетпеген ұжымдар – ҚФФ Академиясы мен «Тобыл». Егер алғашқысында «Қайсармен» кейінге шегерілген ойын болса, қостанайлықтардың жағдайы қиынырақ.

Бесінші турда «Тобыл» U-17 «Шахтердегі» қатарластарының қонағы болып, 1:2 есебімен есе жіберді. 6-минутта «кеншілер» он ойыншымен қалды (Әли Садырбаев қызыл қағаз алды), бірақ соған қарамастан жеңісті жұлып алды – Тимур Казанцев пен Абылай Тоқтасын мергендік танытты.

Қостанайлықтар үшін жалғыз жағымды сәт – Александр Кисляктың голы. Бұл гол команданың биылғы маусымдағы алғашқы добы болды.

Freedom QJ League U-16

«Жас Қыран» аралықты қысқартты

Егер U-17 турнирінде алматылықтар «Ордабасыдан» жеңілсе, кіші жас санатында бәрі басқаша өрбіді: Дамир Абдуллиннің дублі «Жас Қыранға» 2:1 есебімен жеңіс сыйлады.

Өткен турда оңтүстік астананың жасөспірімдері «Ертістен» ұтылса, шымкенттіктер жеңісті сериясын төрт матчқа дейін жеткізген болатын. Бесінші тур «Ордабасы» үшін алғашқы ұпай жоғалтумен аяқталса, «Жас Қыран» үшін үздік үштікке жақындауға мүмкіндік берді. Қазір шымкенттіктер үшінші орында тұр, өйткені «Қайрат» «Атлетиконы» қапы қалдырды.

«Кеншілердің» Қостанайдағы тартысты жеңісі

Freedom QJ League U-16 турнирінде бес матчтың бесеуінде де жеңіске жеткен жалғыз команда – «Шахтер». «Кеншілер» сырт алаңда «Тобылды» 5:3 есебімен еңсерді. Бұл үш ұпай қарағандылықтарға оңай келмегенін айта кету керек – алаң иелері есепті 3-минутта-ақ ашты, ал бірнеше минуттан соң Арлан Алтыбаев есепті теңестіргенімен, қостанайлықтар тез арада қайта алға шықты.

Соған қарамастан, «Шахтер» күресті тоқтатпай, үзіліске командалар қонақтардың пайдасына 3:2 есебімен кетті. Екінші таймда «кеншілер» тағы бір гол соққанда, «Тобыл» есеп айырмасын ең төменгі деңгейге дейін қысқарта алды, ал соңғы нүкте тек қосымша уақытта қойылды.

«Қайсар» аутсайдерлер шайқасында сенімді жеңіске жетті

Турнирлік кестенің төменгі бөлігіне келетін болсақ, «Қайсар» өз алаңында «Каспийді» 5:1 есебімен тас-талқан етіп, алғашқы жеңісіне қол жеткізді. Алаң иелері сапында голдарды бес түрлі ойыншы соқты: Нұрислам Сапаров, Ілияс Жолдас, Мейіржан Сұлтанулы, Хантөре Мұхитдин және Аслан Төлеубай. Қонақтардан жұбаныш голын Мағжан Мұхат еншіледі.

Енді «қасқырлар» ақтаулық команданы турнирлік кестеде артқа тастап, соңғы орыннан бір саты жоғарылады. Естеріңізге сала кетейік, «Каспий» 4-турда «Атлетикомен» тең түскенінің арқасында жоғары тұрған болатын.

Freedom QJ League U-15

«Қайраттың» қосымша уақыттағы үш голы

U-15 турнирінің ең жарқын оқиғасы – «сары-қаралардың» «Атлетиконы» 7:1 есебімен ірі жеңіліске ұшыратуы болды.

«Қайрат» футболшыларының үш голды екінші таймның қосымша минуттарында соққанын ерекше атап өткен жөн. Иван Сизов командасының сапында бұл кездесуде ең нәтижелі ойыншы Артем Тян болды – ол бірінші таймда екі ассист жасап, матч соңында гол соқты.

Бесінші турдан кейін «Қайрат» U-15 еншісінде бес матчтан бес жеңіс, соғылған 32 гол және өткізілген 4 қана доп бар – бұл барлық көрсеткіштер бойынша көшбасшылық.

5-турдан кейінгі үздік сұрмергендер

Freedom QJ League U-17: Темірлан Әбжапар («Қайрат», 6 гол);
Freedom QJ League U-16: Балахмет Әділбек («Тобыл», 7 гол);
Freedom QJ League U-15: Артур Гарифуллин («Тобыл») және Диас Әбубәкір («Қайрат», 7 голдан).

5-турдан кейінгі үздік ассистенттер

Freedom QJ League U-17: Темірлан Әбжапар («Қайрат», 5 нәтижелі пас);
Freedom QJ League U-16: Дамир Әлібаев («Тобыл», 5 нәтижелі пас);
Freedom QJ League U-15: Илфрат Елақаев («Қайрат») және Санжар Байдәулетов («Ақтөбе», 4 нәтижелі пастан).