«Боруссия» Мёнхенгладбах академиясы: жақынырақ танысамыз

«Ақ-қара-жасылдар» академиясымен жақынырақ танысуды ұсынамыз.

«Боруссия» академиясының жасөспірімдер жүйесінде U-9-дан U-19-ға дейінгі жас санаттарындағы командалар бар. Сондай-ақ, «Батыс» аймақтық лигасында өнер көрсететін, жасы 23-тен аспайтын ойыншылардан құралған дубльдік құрам да жұмыс істейді.

Төрт жылдан астам уақыт бойы академия директоры қызметін Мирко Зандмёллер атқарып келеді – ол мансап сатысымен «Боруссия» жүйесінің ішінде өскен маман. Клубқа 2008 жылы келіп, үлкен жолдан өтті. Академияның бірнеше жасөспірімдер командасында бас бапкердің көмекшісі болып жұмыс істеді, кейін U-14 және U-15 құрамдарын өзі жаттықтырды, содан кейін менеджерлік позицияларға ауысты: алдымен интернат жетекшісі, кейін академия басқарушысы болды.

Клубтың жасөспірімдерді даярлау орталығы BORUSSIA-PARK аумағында – негізгі команданың үй аренасы мен клубтың басқа да нысандарының жанында орналасқан. Түрлі жаттығу алаңдары, киім ауыстыратын бөлмелер, тренажер залы және оңалту кабинеттері – барлығы қолжетімді жерде. Әсіресе, тәрбиеленушілердің бірінші команданың кәсіпқойларымен қатар жаттығуы өте маңызды.

«Боруссия» жасөспірімдер инфрақұрылымының жүрегі – кампус. 2014 жылы ашылған FohlenCampus академия жұмысына арналған негізгі үй-жайларды, соның ішінде бапкерлер мен кеңсе аймақтарын, талдау және жиналыс бөлмелерін, сондай-ақ ойыншылар, қызметкерлер мен қонақтарға арналған кеңістікті біріктіреді.

2018 жылы жасөспірімдерге арналған заманауи жатақхана – FohlenStall құрылысы аяқталды. Бұл сөзді неміс тілінен мёнхенгладбахтық команданың лақап атына сай «құлындар үйі» деп аударуға болады.

Клуб шетелде де өз аясын кеңейтуде: Borussia Academy брендімен халықаралық академиялар Сингапур, Қытай және Швейцария сияқты елдерде жұмыс істейді.

«Боруссия» басшылығының соңғы жылдары жасаған ұзақ мерзімді күш-жігері өз жемісін беруде. Клуб академиясының ең соңғы ірі жетістігі – U-17 командасының өткен жылғы осы жас санатындағы Германия чемпионатындағы жеңісі, финалда «РБ Лейпциг» тәрбиеленушілері тизе бүкті.

Чемпиондық құрам 2008 және 2009 жылғы ойыншылардан құралған еді – QJL All Star құрамасына қарсы сол маусымның көптеген қаһармандары өнер көрсететіні анық.

Бұл титулдың қаншалықты маңызды жетістік екенін түсіну үшін қарапайым бір деректі айта кеткен жөн: бұған дейін «Боруссия» U-17 Германия чемпионатында тек сонау 1981 жылы – 45 жыл бұрын жеңіске жеткен!

Қыздар командаларында да үлкен табыстар бар. Мәселен, 2024 жылы «Боруссияның» U-17 қыздар командасы ұлдардан бір жыл бұрын Германия чемпионы атағын жеңіп алды.

«Ақ-қара-жасылдардың» дарынды жасөспірімдерді даярлаудың мықты әрі тұрақты жүйесін құра алғанын соңғы 20 жылда «Боруссияның» сегіз тәрбиеленушісі Фриц Вальтер медалін – Германиядағы маусымның үздік жасөспірімдеріне берілетін беделді жеке марапатты иеленгені де дәлелдейді. Мұндай жүлде XXI ғасырдағы «Боруссияның» ең танымал тәрбиеленушісі, аңызға айналған қақпашы Марк-Андре тер Стегенге екі рет берілген.

Осының бәрі «Боруссия» футбол орталығының іргетасы мықты екенін көрсетеді және Қазақстанның үздік жасөспірімдерінен құралған құрама мёнхенгладбахтық академияның соңғы уақыттағы ең үздік буынымен кездесуі мүмкін деп айтуға толық негіз бар.

Салтанатты Жұлдыздар Матчы 11 шілдеде Алматыда өтеді – жаңалықтардан қалып қоймаңыздар!