Лига әр маусымның қорытындысы бойынша табыстайтын жеке марапаттармен таныстыруды жалғастырамыз.
Еске сала кетейік, әр марапатқа Қазақстан футболының белгілі тұлғаларының есімі берілген. Флагмандық турнирдің үздік бомбардиріне берілетін сыйлық Евстафий Пехлеваниди есімімен аталады.
Евстафий Пехлеваниди – кеңестік футболшы, КСРО спорт шебері.
Мансабын 1977 жылы шымкенттік «Металлург» клубында бастады. 1979 жылы команда сапында 28 гол соғып, келесі маусымда «Қайратқа» ауысты да, 1980–1989 жылдары осы клубтың намысын қорғады. Ол – КСРО жоғары лигасында «Қайрат» сапында ең көп гол соққан ойыншы: алматылық клубтағы 10 жыл ішінде «Пеха» 273 матчта 94 гол соқты, КСРО Футбол федерациясының кубогын жеңіп алды, сондай-ақ 1984 жылғы маусымның үздік 33 футболшысы тізіміне енді.
Пехлеваниди әлі күнге дейін «Қайрат» тарихындағы үздік бомбардир атағын сақтап келеді, ал клубтың балалар академиясының бір филиалына оның есімі берілген.
Жылдар бойынша Freedom QJ League үздік бомбардирлері:
2023 жыл – Рамазан Бағдат («Қайрат», 18 матчта 15 гол).
2024 жыл – Бағдәулет Нұралы («Ордабасы», 22 матчта 22 гол).
2025 жыл – Дәулет Орынбасар («Қайрат», 20 матчта 20 гол).
(0).webp)
