Рамазан Бағдат – Freedom QJ League VI турының үздік ойыншысы

Таңдау WyScout статистикалық деректері бойынша QJ League спорттық-аналитикалық бөлімі жасаған болатын.

Алматылық «Қайрат» қарсылас қақпасына жауапсыз алты доп дарытып, Freedom QJ League тарихындағы ең ірі жеңіске қол жеткізді. Сондай-ақ, төрт гол соққан Рамазан Бағдат Қазақстан жасөпірімдер лигасының жаңа тарихындағы алғашқы «покер» авторы атанды. Бірінші тайм нәтижесі бойынша, жеңімпаз кім болады деген сауал көпті мазаламады десек артық айтқанымыз емес. Жоғарыда айтып өткен Рамазан алдымен 12-ші минутта командасын алға шығарса, араға бірнеше минут салып есепті еселеді. Қосымша уақытта алматылықтар айырмашылықты үш допқа дейін жеткізді – 0:3.

Бұл кездесуді Рамазан Бағдат атындағы ойын деп те айтуға болады. Екінші таймда тағы қос гол соққан бұл шабуылшы нәтижелі пас беріп тағы көзге көрінді. Осылайша, Рамазанның пасынан кейін ойын нүктесі қойылып кездесу 0:6 есебімен аяқталды. Алматылық «Қайрат» жарыстағы ең ірі жеңіске қол жеткізіп, бүгінде турнир кестесінің көшін бастап келеді.