Төленді – Лигадағы покерлердің басты шебері! Бұл жетістікке тағы кімдер жеткен еді?

Бір турда төрт гол соққан ойыншыларды еске түсірейік.

Үш покердің жалғыз авторы – Ануар Төленді

Айта кетейік, біздің рейтинг көшбасшысы өзінің үшінші покерін жуырда өткен Freedom QJ League B турында жасады. Ол ойында Ануар өнер көрсететін ҚФФ Академиясы «Елімайды» 6:0 есебімен тас-талқан етті. Бұған дейін жас шабуылшы «Астана» сапында Freedom QJ League U16 турнирінде ойнаған – сол кезде ол екі ойында қарсыластарына төрт голдан соққан («Атырау» мен «Каспийге»).

Кім біледі – мүмкін, алдағы уақытта ол флагмандық турнирде де төрт гол соғар?

Екі покерден – Сәтпаев, Пазыл және Николенко еншісінде

Төлендіден басқа, Лига тарихында небәрі үш ойыншы ғана бір ойында төрт голдан артық соға алған. Олар – «Қайрат» шабуылшысы Дастан Сәтпаев, қыздар турниріндегі Милена Николенко («Қайрат») және Асыл Пазыл («Астана»).

Дастан Сәтпаев – Лигадағы басты турнирдің тарихындағы үздік сұрмерген. Ол өзінің алғашқы покерін 2024 жылғы маусымның ашылу матчында «Тобылға» қарсы соқты. Бұған бар-жоғы 43 минут жұмсады, ал матч 12:1 есебімен аяқталды. Бірнеше айдан кейін «Қайсарға» қарсы ол пента-трик авторы атанды (10:0).

13 жастағы Милена Николенко – бір ойында бірден алты гол соққан Лигадағы жалғыз футболшы қыз. Бұл Freedom QJ League W 8-турындағы «Жетісуға» қарсы ойында болды (11:1). Кейін 12-турда ол «Шахтерге» қарсы тағы төрт гол соқты (8:2).

Асыл Пазыл болса, «Жетісуға» қарсы ойында 4+3 («гол+пас») нәтижесімен көзге түсті, ал қарымта ойында пента-трикпен ерекшеленді.

Айтпақшы, сол матчта тағы бір елордалық ойыншы – Әлзия Жамбыл да покер жасады.

Сатеновтың ерекше покері

Биыл Найман Сатенов жасаған жетістікті де еске алмауға болмайды – оны қайталау қиынға соғар.

7-турда «Ертіске» қарсы матчта «Шахтер» жартылай қорғаушысына төрт рет пенальти соғу мүмкіндігі тиді – барлығы сәтті орындалды. Нәтижесінде қарағандылықтар павлодарлықтарды 4:3 есебімен жеңді.

Бәрі Бағдаттан басталды

Лигадағы алғашқы покер иесі – «Қайрат» ойыншысы Рамазан Бағдат. Ол дебюттік маусымның 6-турында «Шахтердің» қақпасына төрт гол соқты, ал матч 6:0 есебімен аяқталды. Сонымен қатар, ол соңғы минутта голдық пас та берді – оны Дияс Түлеу голға айналдырды.

15 ойыншыдан тұратын элиталық клуб

Жоғарыда аталған футболшылардан бөлек, негізгі турнирде төрт голдан соққан тағы екі ойыншы бар: Азамат Тұяқбаев («Қайрат», 2024) және Мақсат Абраев («Астана», 2025).

Сонымен қатар, төрт гол соққандардың қатарына: Мағжан Серібек («Жетісу», 2024, QJL U17 B), Дәулет Орынбасар («Қайрат», 2024, QJL U17 A), Руслан Валихан («Астана», 2024, QJL U17 A), Нилеш Шарма («Қайрат», 2025, QJL U17), сондай-ақ қыздар турнирінен Ангелина Остер («Қайрат»), Софья Рыбак («Астана») және жоғарыда айтылған Әлзия Жамбыл («Астана») кіреді.

Осылайша, Freedom QJ League тарихында бір ойында төрт гол соғу жетістігіне барлығы 15 ойыншы қол жеткізді. Ал осы күзде бұл элиталық клубқа тағы біреу қосыла ма екен?