Рохус Шох QJL All Star туралы: «Біз футболымыздың үлкен болашағын – бүгін жасап жатырмыз!»

– Бұл футбол мерекесі ең алдымен біздің жас ойыншыларымыз бен балалар жаттықтырушылары үшін. Бәрі соларға арналып жасалады.

Біз мұндай ауқымды шараларды бірінші рет өткізіп отырған жоқпыз. Таразда да, Қызылордада да, Өскеменде де, Павлодарда да стадионды лық толтырған күндер болды. Мұның бәрі – қалыпты әрі дұрыс қадам. Өйткені осылайша біз жастар футболына назар аудартамыз.

Ал «Атлетико» сияқты академияны шақыру – өте қымбат әрі бағалы мүмкіндік. Ол жақта Испанияның U-15-тен U-19-ға дейін жеті ойыншысы бар, алты футболшы негізгі құраммен жаттығады. Біздің жігіттер үшін бұл өзін сынап көруге теңдессіз мүмкіндік.

Маған жеке өзіме спорттық нәтиже екінші орында. Ең бастысы – жанкүйерлер үшін осындай мереке, ал жас ойыншылар мен бапкерлер үшін өзін жоғары деңгейде сынап көру мүмкіндігі. Осындай кездесулер футболды тек танымал етіп қоймай, оның дамуына жаңа серпін береді.

Мұның бәрін біз бірге істеп жатырмыз: Freedom Holding Corp., ҚФФ, бас инвестор ретінде Тимур Турлов. Баршаңызға алғыс айтамын.

Мен әрдайым айтып жүрмін: бұл жобаны Тимур Турловпен бірге бастаған адам ретінде, Freedom QJ League идеясының авторы ретінде, ең қиыны – команда жинап, медиа, маркетинг, спорттық талдау мен басқарудағы мамандарды табу болды. Қазақстанда, тіпті ең жақын достарымның өзі: «Мұндайды істеу мүмкін емес» деді. Бұл үлкен сынақ еді.

Біз оны 2022 жылы еңсердік. Сегіз ай бойы команда жасақтадық. «Таныстықпен» кірген бір де бір адам болған жоқ – бәрі ашық конкурс арқылы өтті. Жүздеген түйіндеме, ондаған сұхбат... Осылайша ғана біз бүкіл елден жас мамандарды жинап, қазақстандық жасөспірім футболының жаңа тарихын бастап кеттік.

Әрине, өзін футболдың қожасы санайтын қызғаныш иелері бар. Бірақ жанкүйерлердің, мамандардың, бапкерлердің, ардагерлердің басым бөлігі бізбен бірге. Жігіттер олардың жүрегіне жол тапты. Сендер балалардың, қыздардың, ата-аналардың, ата-әжелердің, достардың, мұғалімдердің жүрегіне жол салдыңдар. Бүгін бүкіл Қазақстан Freedom QJ League-ті сүйеді.

Лига – Қазақстан футбол федерациясының жобасы. Біз бірге үлкен тарих жазып жатырмыз, футболымыздың үлкен болашағын бүгіннен бастап жасап жатырмыз! Бүгін! Бұл – біздің ұранымыз.

Дереккөз: «Тотальный футбол KZ»