Рохус Шох Astana Motors Manufacturing Kazakhstan зауытына барып келді

Сапар барысында ол Лиганың премиум серіктесі – Changan Kazakhstan компаниясының директоры Денис Коломацкиймен жұмыс кездесуін өткізді. Тараптар маусымның негізгі қорытындыларын шығарып, алдағы серіктестік жоспарларын талқылады.

Зауыт бойынша экскурсияны Freedom QJ League президентіне Astana Motors Manufacturing Kazakhstan компаниясы бас директорының орынбасары Илья Рубцов жүргізді.



Толық өндірістік циклмен жұмыс істейтін кәсіпорын биылғы күзде іске қосылды.

Зауыттың жалпы аумағы – 309 мың шаршы метр, ал өндірістік кешеннің ауданы – 211 мың шаршы метр. Кәсіпорын жылына 120 мың жеңіл автокөлік шығаруға қауқарлы.

Жобалық қуатқа шығу кезеңінде зауыт 3 600 жұмыс орнын қамтамасыз етіп, көлік бағасын төмендетуге және оны қазақстандықтар үшін қолжетімді етуге мүмкіндік берді.

«Мен толық өндірістік процеспен таныстым. Заманауи жабдықтар, зауыттың инфрақұрылымы – барлығы әсер қалдырды. Astana Motors және Changan Kazakhstan серіктестерімізге шақырғандары және жылы қарсы алғандары үшін алғыс білдіремін.

Freedom QJ League мен Astana Motors өз қызметінде ортақ құндылықтарға сүйенеді. Біздің миссиямыз – еліміздің тұрғындары үшін жаңа мүмкіндіктер мен әлеуметтік лифтілердің іргетасын қалау», – деп атап өтті сапар қорытындысында Рохус Рохусович.

Еске сала кетейік, Freedom QJ League маусым басында Changan Kazakhstan және Astana Motors компанияларымен премиум серіктестік туралы келісімге қол қойған болатын. Компания Лиганың барлық басты жобалары мен іс-шараларына, соның ішінде мадридтік «Атлетикоға» қарсы өткен QJL All Star матчы сияқты оқиғаларға белсенді түрде атсалысып келеді.

Бұдан бөлек, биыл премиум серіктестің қолдауымен Freedom QJ League U18 футболшылары үшін ерекше марапат – Changan MVP of the Season номинациясы іске қосылды.

Маусымның ең пайдалы ойыншысы атанған футболшы (есімі 1 қараша күні QJL Awards салтанатында жарияланады) шетелдік клубтардың бірінде қаралымнан өтуге арналған грантқа ие болады.