Алматыдағы семинар өз мәресіне жетті: Лига бапкерлері әсерлерімен бөлісті

Күн кеше өткен тәжірибелік сабақтарды талдаудан басталды. Семинар қатысушылары топтарға бөлініп, өткізілген жаттығуларды талқылады.

Одан кейін ҚФФ Техникалық орталығының жетекшісі Станислав Погорелов бапкерлерге федерацияның «Болашақ чемпиондар» жобасын таныстырды. Келесі сөз Лиганың спорттық-сараптамалық бөлімінің мадридтік «Атлетикоға» қарсы QJL All Star ойынына дайындаған стратегиясына арналды. Соңында қатысушылар семинардың қорытындысын шығарды.

Дамир Даутов, бас бапкердің көмекшісі, «Қайрат» 2009: «Менің ойымша, мұндай семинарлардың маңызы зор, тіпті олар ұзақ болмаса да, үш күндік болса да. Біз бәріміз жиналамыз, танысамыз, тәжірибе алмасамыз, ақпаратпен бөлісеміз. Бірінші күні теориялық сабақтар өтті, танысу болды. Екінші күні практика: біз өзіміздің дағдыларымызды жаттығу процесінде, футбол алаңында көрсеттік, қарым-қатынас жасадық. Бұл жасөспірімдер командаларының барлық бапкерлері үшін өте маңызды. Осындай семинарлар жиі өтетін болса, тамаша болар еді».

Павел Евтеев, бас бапкер, «Алтай»: «Семинар қарым-қатынас пен жаңа білім алу тұрғысынан өте нәтижелі өтті деп санаймын. Ескі әріптестерімізбен кездестік, сөйлестік, жоспарларды талқыладық. Осындай қарым-қатынас жасауға мүмкіндік берілсе, бұл үлкен плюс. Freedom QJ League басшылығына бапкерлердің, әсіресе жас мамандардың кәсіби дамуына мүмкіндік бергені үшін алғыс айтқым келеді. Жалпы қазақстандық футболдың дамуына оң әсер ететін осындай семинарлар көп болсын деп тілеймін».

Естеріңізге сала кетейік, сабақтар Лиганың спорттық-сараптамалық бөлімі мен Қазақстан футбол федерациясының Техникалық орталығы бірлесіп өткізді. Соның арқасында бапкерлер УЕФА конвенциясына сәйкес лицензияларын ұзартуға қажет сағаттарды тегін ала алады. Бұған дейін осындай семинар Астанада өткен болатын.