Медаль үшін тартыс қызып тұр: Freedom QJ League W-дің 10-турына шолу

«Тобылдың» өрлеуі

Тур Қостанай командасы үшін барынша сәтті өтті – шілдедегі бес матчта бес ұпай жинаған Денис Сафроновтың шәкірттері «Жетісуды» 9:1 есебімен ойсырата жеңіп, бәсекелестерінің жеңілістері фонында турнирлік кестенің үшінші сатысына көтерілді.

Талдықорғандық футболшыларға қарсы ойында Асем Доскеева (гол және екі пас) мен Айя Құсайынова (дубль) маңызды рөл атқарды. Сондай-ақ Асель Санат, Анастасия Шерстнева, Амура Қарабаева және Асем Үскінбаева да гол соқты – қызығы, олардың есімдерінің бәрі бір әріптен басталады. Қонақтардың тағы екі голы – «Жетісу» қорғаушысы Мадина Мұхтардың автоголдары.

Алаң иелерінен Айнұр Ануарбек мерейлі голдың авторы атанды, оған нәтижелі пас берген – маусымдағы сегізінші нәтижелі әрекетін жасаған Нұрай Болатова.

«Тобылдың» алғашқы үштікке кіруі сәттілік болғанымен, артықшылығы әлі де нәзік – алда төрт тур, ал соңғы орыннан небәрі екі ұпай ғана алда.

Ақтөбеде Рыбактың хет-тригi

Маусым соңына аз ғана ойын қалды, бірақ «Астана» «Қайраттың» алдын ала чемпион болуына жол бергісі жоқ. Астаналық клуб сырт алаңда «Ақтөбені» оңайлықпен емес, жеңіп шықты.

Софья Рыбак алғашқы таймда екі гол соғып, командасына ыңғайлы артықшылық сыйлады, бірақ «қызыл-ақтар» берілмеді – 56-минутта Айжан Есеркепова бір голын қайтарды. Көп ұзамай Асыл Пазыл алаң иелерінің қақпасын дәл көздеді, алайда «Ақтөбе» көп күттірмей-ақ Маликә Асқарованың пенальтисімен жауап қатты. Қонақтардың жағдайы қосымша минуттарға дейін тұрақсыз болды, бірақ матчтың соңында Рыбак шешуші соққыны жасады – 4:2.

«Шахтер» сәтсіздіктер сериясын үзді

Күтпеген жағдай Қарағандыда орын алды. «Золушкалар» маусым айының соңынан бері алғаш рет ұпай еншілеп, «Ордабасыны» тізе бүктірді.

Матч тағдырын 42-минуттағы Ксения Сандер мен 69-минуттағы Дамира Мақсаттың дәл соққылары шешті. Бірінші голда шешуші пас берген – Мақсаттың өзі, ал оған нәтижелі пас берген Саида Дюсембаева. Маусымның алғашқы матчтарында әсерлі дуэт атанған бұл қос жұп алты ойында алғаш рет нәтижелі әрекет жасады – Дамира мен Саидадан келесіде не күтеміз?

Бұл жеңіс қарағандылықтарға медаль үшін күресті жалғастыруға нақты мүмкіндік берді – «Жетісудан» басқа ешкім жарыстан шығып қалған жоқ.

«Қайрат» көшбасшылығын жалғастыруда

Біз бұған дейін бүкіл турнирдің басты сенсациясына айналуы мүмкін матч жайында айтқан едік – «Қайрат» Павлодарда ұпай жоғалтуға шақ қалды.

Алайда бұл болмады, және аз ғана айырмашылықпен сырт алаңда жеңіске жеткен «сары-қаралар» «Астанадан» алты ұпай алда тұр. Маусым соңына дейін төрт матч қалды, оның ішінде 13-турдағы екі астананың дербиі бар.