Медаль үшін тартыс жалғасуда: Freedom QJ League XVII турына шолу

«Шахтер» – «Каспий»: міндеттер әртүрлі, бірақ мотивация жоғары

«Тобылмен» өткен ойында «Жас Қыранның» сүрінуі мен алматылықтарға қарсы жеңісі арқасында «кеншілер» маусымды екінші орында аяқтауға жақсы мүмкіндік алды. Бірақ ол үшін қарағандылықтар алдыңғы қателіктерін қайталамай, ұпай жоғалтпауға тиіс.

Ал «Каспий» турнир кестесінің соңынан әлі де көтерілуі мүмкін. Ақтаулықтар «Тобылдың» кейінге қалдырылған матчтардағы жеңістерінен кейін қайтадан соңғы орынға түсті. Әлі алты тур бар – Мирас Тулиев шәкірттері оңай берілмейтіні аңық.

«Жас Қыран» – «Ақтөбе»: алматылықтар есін жия ма?

Осы маусымда жеңілмей келе жатқан алматылықтар қатарынан екі рет ұтылып, жүлдеге үміттерін қауіпті жағдайға әкелді. «Жас Қыран» әлі де екінші орында, бірақ алтыншы орыннан бар болғаны бес ұпай алда, сондықтан жүлдеге таласушылар саны аз емес.

«Ақтөбе» соңғы үш ойында жеңілді. Дегенмен, дәл осы «ақ-қызылдар» екі рет «Астанадан» ұпай тартып алып, «Шахтермен» тең ойнағанын естен шығаруға болмайды. Сондықтан бұл кездесу қызық болмақ.

«Ордабасы» – «Тараз»: екі алтылықтың шекарасы

Оңтүстіктің екі командасы турнир кестесінің ортасында, бірақ оларды алты ұпай бөліп тұр. «Тараз» жеңген жағдайда алғашқы алтылыққа кіру үмітін сақтайды. Дегенмен, сырт алаңдағы сәтсіз нәтиже мықтылар мен әлсіздер арасындағы алшақтықты тіпті арттыра түседі.

«Тобыл» – «Қайрат»: қостанайлықтар алматылық тағы бір клубты жеңе ме?

Қостанайлықтар кейінге қалдырылған екі матчта «Жас Қыранды» және «Ақтөбені» жеңіп, ұпай қорын толықтырды. Дегенмен, олардың арасында «Ордабасыдан» ұтылып қалғаны бар.

Енді Олег Лотов шәкірттері екінші айналымдағы ең қиын сынаққа тап болады – еске салсақ, Алматыдағы «Қайратпен» ойында 1:6 есебімен ұтылған еді.

Алайда 12-турда «Каспий» «сары-қаралармен» сенсациялық түрде тең ойнап, футболда тосын жағдай әрқашан болатынын көрсетті. «Тобыл» осы нәтиженің қайталануына немесе одан да асып түсуіне қол жеткізе ала ма?

«Атырау» – «Қайсар»: оңай шағылар қарсылас жоқ

«Мұнайшылар» «Тобылды» ірі есеппен ұтқаннан кейін қатарынан үш ойында жеңіліп қалды, бірақ барлығы да минималды айырмашылықпен – әрі қарсыластарының бәрі жүлдеге таласып жүрген командалар болды.

Ал «Қайсар» да оңай шағылардан емес – алматылық клубтарға қарсы екі ірі жеңілісті есептемегенде, «қасқырлар» соңғы жеті кездесудің бесеуінде тең түсті. Екі аутсайдер арасындағы тартысты матч қалай аяқталады? Жақында білеміз.

«Астана» – «Ертіс»: медаль жарысында орын ауысу бола ма?

Астана клубы павлодарлықтардан екі ұпайға қалып келеді. Жеңіске жеткен жағдайда оларды турнир кестесінде артқа тастайды. Екі команда да жүлде үшін таласуда, бірақ формалары бәсекелестерінікіндей мықты емес. Өткен турда астаналықтар Атырауда әрең жеңіске жетсе, «Ертіс» «Ақтөбемен» тек соңғы минуттарда тең ойынды жұлып алды.

Бұл ойында біреу артықшылыққа ие бола ма, әлде екі команда бір-бірінен ұпай тартып ала ма?