Интрига ушыға түсті: Freedom QJ League B лигасы 5-турының басты сәттері

«Алтайдың» уыстан шыққан жеңісі

Өскемендік ұжым ақыры алғашқы ұпайына қол жеткізді – «Атыраумен» өткен үй алаңындағы кездесу 1:1 есебімен аяқталды. Бірақ бұл нәтиже Павел Евтеевтің шәкірттері үшін сәл де болса көңіл көншітпейтіндей көрінуі мүмкін.

Мәселе мынада, 5-минутта-ақ Дәулет Дәуітбаевтың күшімен есеп ашқан «Алтай» екінші таймның қосымша минуттарына дейін басымдықты уысында ұстап тұрды. Тек ойын уақыты таусылуға шақ қалғанда ғана Альберт Сидихов есепті теңестіріп кетті.

Дегенмен, қатарынан болған жеңілістерден кейін бұл тең ойын футболшылардың рухына оң әсер етуі мүмкін – оның үстіне, соңғының алдында келе жатқан «Қызылжардан» қалысу тек екі ұпайды құрайды.

«Елімай» сырт алаңда «Қызылжарды» тас-талқан етті

Петропавлдың командасы өз алаңында ірі есеппен жеңіліп, «Алтайдан» ұпай айырмашылығын ұзарта алмады – «Елімай» алаң иелерінің қақпасына жауапсыз төрт доп соқты. Дарын Уалханов дубль жасаса, Санжар Бекенов пен Анас Әділханов тағы бір-бір голдан еншілеріне жазды.

Осы жеңістің арқасында «Елімай» турнирлік кестенің ортасына жақындай түсті – бұған қоса, төртінші сатыда келе жатқан «Жетісудан» қалысу бар-жоғы үш ұпай ғана.

Енді көшбасшылар үшеу

Жетісулықтар өз алаңында «Жайықты» сенсациялық түрде ұтып, төртінші орындағы позициясын бекіте түсті. 17-минутта Айбын Дәулетұлы есеп ашқаннан кейін, Оралдан келген қонақтар ештеңемен жауап қайтара алмады.

Бұл ұпай жоғалту «Жайық» үшін алғашқы сәтсіздік болды, ал олардың бәсекелестері бұл мүмкіндікті қалт жіберген жоқ. «Жеңіс» Әмірхан Абайдың дублінің арқасында «Астана Аренада» «Оңтүстікті» жеңсе (2:1), «Хан-Тенгри» Көкшетауда «Оқжетпесті» ірі есеппен (4:1) тізе бүктірді – хет-трик авторы атанған Жанәді Жұмабек матчтың басты қаһарманы болды.

Енді чемпиондық жарыста қоржынында 12 ұпайы бар бірден үш команда бар: олар – «Жайық», «Хан-Тенгри» және «Жеңіс». Дегенмен турнирлік кесте өте тығыз, сондықтан ең қызықтысы әлі алда.

5-турдан кейінгі үздік сұрмерген (бомбардир): Жанәді Жұмабек («Хан-Тенгри», 6 гол).
5-турдан кейінгі үздік ассистенттер: Ярослав Бортник («Атырау») және Вадим Сайбель («Елімай», екеуінде де 3 нәтижелі пас).