Дәстүрлер, ұлттық асхана және жылы атмосфера: QJL All Star мен «Атлетико Мадрид» ойыншылары Алматы маңындағы тауда гала-кеш өткізді

Ұйымдастырушылардың мақсаты – жас футболшыларды одан әрі біріктіру ғана емес, болашақ қарсыластарымен танысуына жағдай жасау және Қазақстан мәдениетімен жақынырақ таныстыру еді.

Футболшылар, бапкерлер және Лига мен испан клубының мамандары Алматы маңындағы көрікті Жаңа-Тас шатқалында орналасқан «Гунны» этно-аулына жиналды. Қонақтарды «Шашу» дәстүріне сай салтанатты түрде қарсы алды – қақпада салт аттылар, ұлттық киімдегі әйелдер тәттілермен және домбырашы күйшілермен күтіп тұрды.

Келгендер қазақтың дәстүрлі тағамдарымен – бауырсақпен, қымызбен дәм татты. Бұл дәм үйлесімі испан қонақтарының көңілінен шықты.



Одан кейін меймандарды киіз үйде қазақ халқының тұрмыс-тіршілігімен таныстырды. Испандықтар көшпенділердің баспанасы қалай тұрғызылатынын, оған қатысты әдет-ғұрыптар мен наным-сенімдерді білді. Қазақ ойыншылары үшін де бұл балалық шақтағы естеліктерді жаңғыртудың мүмкіндігі болды.



Келесі кезеңде қатысушылар ипподром жолының бойына жайғасып, көз тартымды жамбы ату мен жігіттердің шабандоздық өнерін тамашалады. Нағыз шебер шабандоздар гимнастикалық және акробатикалық трюктер көрсетті. Финалдық аккорд – «шағын пирамида»: шабандоздардың иығына шығып, Қазақстан туын желбіреткен өнерпаз.





Сонымен қатар қонақтар «Қыз қуу» ойынын көрді. Футболшылар да атқа мініп, садақ атып көрді, ұлттық билерге қатысып, испандықтар да биге қосылды.





Соңында гала-ужын басталды. Лига президенті Рохус Шохтың бастамасымен қазақстандық және испандық ойыншылар араласып отырды.

«Сіздерді қонақжай қазақ жерінде қарсы алғанымызға қуаныштымыз. «Атлетико Мадрид» сияқты үлкен клубтың біздің жас жігіттерімізбен ойнайтыны – бәріміз үшін үлкен мәртебе. Әрине, біз матч өткіземіз, спортта нәтиже маңызды.

Бірақ мен үшін ең бастысы – бір-бірімізбен танысып, араласу. Бүгінгі ең маңызды нәтиже – сіздердің бір үстелде бірге отырғандарыңыз, достық қарым-қатынастың басталуы», – деді Рохус Рохусович.

Жас ойыншылардың арасы тез жақындап, тілдік кедергі кедергі болмады: ағылшын тілін білетіндер аударып, барлығы еркін әңгімелесті.



Ас мәзірінде қазақтың дәстүрлі тағамдары – бесбармақ пен қуырдақ, сондай-ақ еуропалықтарға үйреншікті жеңіл тағамдар болды. Диета ұстанатындар үшін салаттар мен жеңіл тіскебасарлар ұсынылды.

Ақыры қоштасатын сәт те келді – «Атлетико» делегациясына сыйлықтар табыс етілді. Дәл сондай жейделер қазақстандықтарда да болғандықтан, ортақ суретте бәрі бір үлкен команда сияқты көрінді.



Бірақ достық пен қонақжайлық рухы сезілгенімен, басты нәрсені ешкім ұмытқан жоқ – сенбі күні алаңда қожайындар да, қонақтар да жеңіс үшін бар күшін салады.

QJL All Star мен мадридтік «Атлетико» арасындағы матч 23 тамыз күні Алматыдағы «Хан-Тәңірі» стадионында өтеді. Билеттер Freedom Ticketon сайтында қолжетімді.