Қыздар турнирінің кезекті турына шолу.
«Астана» – «Ордабасы»
«Астана» алғашқы төрт турда бірде-бір ұпай жоғалтқан жоқ (12 ұпайдың 12-сі) және жүз пайыздық көрсеткішпен келе жатқан жалғыз команда болып отыр. Елордалық ұжымның қорғанысы да сенімді: маусымда небәрі 1 гол жіберіп, үш матчта қақпасын құрғақ сақтады.
«Ордабасы» жетінші орында келеді және әлі де алғашқы жеңісін күтіп жүр. Дегенмен соңғы екі турда «Шахтермен» (3:3) және «Ақтөбемен» (1:1) тең түсіп, алғашқы ұпайларын жинады. Бір жыл бұрын шымкенттік клуб төртінші орын алған еді, сондықтан қазіргі жағдай командаға қарқын қосуға себеп болуы тиіс. Алайда турнирдегі ең сенімді қорғанысты бұзу оңай болмайды: қонақтар сенсация жасай ала ма?
«Ертіс» – «Қайрат»
Өткен турда «Қайрат» «Астанадан» жеңілгеннен кейін ес жиып, «Тобылды» ірі есеппен жеңді (6:1). Алматы футболшылары соққан 17 гол – чемпионаттағы үздік көрсеткіш. Қазіргі чемпиондардың шабуылында Ангелина Кленова мен былтырғы турнирдің «алтын бутса» иегері Милена Николенко көш бастап тұр – екеуінің де еншісінде 4 голдан бар.
Ал «Ертіс», еске сала кетейік, бір ұпаймен турнир кестесінің соңғы сатысында тұр. Павлодарлық команданың қақпашысы Аружан Сағиева үш матчта 21 сейв жасап үлгерді – бұл турнирдегі үшінші көрсеткіш.
Көрермендер бұл матчта үлкен сенсацияның куәсі бола ма? Жақында білеміз.
«Ақтөбе» – «Шахтер»
Бұл турдағы ең тең бәсекелі жұп деуге болады. «Шахтер» «Астанадан» кейін әлі жеңілмеген жалғыз команда ретінде 8 ұпаймен турнир кестесінің үшінші орнында келеді.
Есебінде 5 ұпайы бар «Ақтөбе» футболшылары – турнирдің басты жаңалығына айналған қарағандылықтардың ең жақын ізбасарлары. Алайда өткен турда «қызыл-ақтар» «Ордабасымен» тең ойнап (1:1), ұпай жоғалтты. Тікелей бәсекелеске есе жіберу қауіпті болмақ.
«Шахтер» жеңіліссіз сериясын жалғастыра ма, әлде «Ақтөбе» турнир кестесінде жоғары көтеріле ме?
«Тобыл» – «Қайсар»
Турнир кестесіндегі көршілер кездеседі – екі командаға да ұпай қажет. «Тобыл» 4 ұпаймен бесінші орында тұрса, «Қайсар» алаң иелерінен бір ұпайға қалып, алтыншы сатыға жайғасқан.
Қонақтар қазіргі таңда чемпионатта ең көп гол жіберген команда – 17 доп. Ал қызылордалық команданың барлық төрт голын соққан Шамсия Зарлыхан соңғы екі кездесуде мергендігімен көзге түсе алмады – ол маңызды ойында қайтадан дәлдік таныта ала ма?
