Жания Махаш: «Өткен маусымға қарағанда одан да көп гол соққым келеді»

Freedom QJ League W чемпионы, «Қайрат» клубының жартылай қорғаушысы Жания Махаш осы құрамалардың ішінде кіші жас санатындағы командаға шақырту алды.

Ол маусымаралық кезеңін қалай өткізгені туралы айтып, сәуір айында өтетін Еуропа чемпионатының іріктеу матчтарына қатысты өз күтулерімен бөлісті.

— Қысқы демалыс кезінде мен жаттығу залында жұмыс істедім. Сәуір айындағы матчтарға дайындық жақсы өтіп жатыр.

Ұлттық құрама сапында ойнау – өте керемет. Мен елімнің намысын қорғаймын, бұл мен үшін үлкен мәртебе. Әрқашан дайынмын және ештеңеден қорықпаймын.

Құрамада негізінен бәріміз бір-бірімізді танимыз, бірақ жаңа қыздар да қосылды. Барлығымыз жақсы араласамыз.

— Алда Черногорияға барасыңдар. Бұрын ол жақта болғансың ба? Бұл сапардан не күтесің?

— Жоқ, мен ол жақта әлі болған емеспін. Ал матчтарға қатысты айтсам, біздің мақсат – А лигасына шығу.

— Бұған дейінгі халықаралық сапарларың туралы және алған әсерлерің туралы айтып берші.

— Біз Швецияда, Солтүстік Ирландияда және Беларусьте болдық. Әсеріміз өте керемет болды. Саяхаттау өте қызық.

— Өткен маусымдағы ең басты оқиға сен үшін не болды?

— Freedom QJ League W турниріндегі біздің жеңісіміз.

— 2026 жылға арналған басты жоспарларың қандай?

— Тағы бір титул жеңіп алу, жеңіліссіз серияны жалғастыру және ұлттық құрамамен бірге А лигасына шығу. Ал жеке мақсаттарыма келсек, өткен маусымға қарағанда көбірек гол соғып, жақсы нәтиже көрсеткім келеді.

Еске салайық, өткен маусымда Жания Freedom QJ League W турнирінің 13 матчында 11 гол соғып, 23 нәтижелі пас беріп, турнирдің үздік жартылай қорғаушысы атанған болатын.

Қазақстанның WU-17 құрамасы Молдова және Черногория футболшыларымен кездеседі. Матчтар 4 және 7 сәуір күндері Даниловград қаласында өтеді.