Флагмандық турнирдің кезекті турын қорытындылаймыз.
Алты матчтың төртеуі тең аяқталды, оның үшеуі 2:2 есебімен бітіп, ойындарға толы демалыс күндері тартысты өтті.
«Қайрат» маусымда алғаш рет екі гол жіберді
Мерзімінен бұрын чемпион атанған «Қайрат» Алматы дербиінде ұпай жоғалтты.
Қонақтар кездесуді сенімді бастады: 6-минутта «сары-қаралардың» капитаны Алихан Жұмабек есеп ашты, ал 38-минутта қорғаушы Алихан Досанов маусымдағы алғашқы голын соғып, басымдықты екі еселеді.
Алайда екінші таймда «Жас Қыран» есепті теңестіре алды. 61-минутта қосалқы құрамнан алаңға шыққан Сергей Шарунов биылғы сегізінші голын соқты, ал 76-минутта қорғаушы Сұлтан Әбдіманап маусымдағы алғашқы голымен қорытынды есепті орнатты – 2:2.
«Қайрат» үшін бұл маусымдағы екінші тең ойын және бір матчта бір голдан артық жіберген алғашқы кездесу болды.
Айта кетейік, Талғат Қанышевтің командасы екі үздік сұрмергені – Дәулет Орынбасар мен Роман Черноморецсіз ойнады. Соңғысы қорғаушы Алихан Әбдімен бірге U-17 турниріндегі жеңісті матчқа (4:2) қатысып, бір гол соқты.
Осылайша, «Жас Қыран» «Ордабасыдан» кейін чемпионнан ұпай алған екінші команда атанды. Олег Трофимовтың шәкірттері қатарынан төртінші рет тең ойнап, жеңіліссіз сериясын жеті матчқа жеткізді.
«Каспий» «Шахтерге» қарсы екі рет есепті теңестірді
Ақтауда өткен кездесуде кеншілер екі рет алға шыққанымен, жеңісті сақтап қала алмады. 28-минутта Ален Пак гол соқты – шабуылшының еншісінде бес матчта төрт гол бар. Алайда үзілістен кейін бірден «Каспий» қорғаушысы Ақылбек Қаржаубай маусымдағы алғашқы голын соғып, есепті теңестірді.
Шешуші оқиғалар матч соңында өрбіді. 87-минутта алаңға қосалқы құрамнан шыққан Артем Алексеев «Шахтерді» қайта алға шығарды. Бірақ екі минуттан кейін «Каспийдің» тағы бір қосалқы ойыншысы, шабуылшы Жандаулет Дүйсенбаев қорытынды есепті орнатты – 2:2. Ақтаулық шабуылшы үшін бұл маусымдағы екінші гол болды. Бір қызығы, ол осы уақытқа дейін алаңда бар болғаны 164 минут өткізген.
Күміс жүлдені қамтамасыз еткен «Шахтер» маусымдағы алтыншы тең ойынын тіркеді. Олардың барлығы сырт алаңда болды.
«Ордабасы» тағы да ұпай жоғалтты
Шымкенттіктер қатарынан үшінші матчта жеңіске жете алмады. Бұл жолы олардың жолын «Тараз» кесті. Қонақтар 11-минутта алға шықты: қорғаушы Асылан Аблайхан маусымдағы алғашқы голын соқты. «Ордабасы» үзіліске дейін екі голмен жауап берді. Алдымен Әділбек Тұрдах маусымдағы 14-голын соқты. Бұл – Дәулет Орынбасардан кейінгі турнирдегі екінші үздік көрсеткіш. Ал тайм соңына қарай Ділшод Назымбеков алаң иелерін алға шығарды.
Алайда 70-минутта Ғалымжан Оразалиев пенальтиді сәтті орындап, қорытынды есепті орнатты – 2:2. Айта кетейік, «Тараз» қорғаушысы бірінші айналымда да «Ордабасыға» гол соққан еді.
Тең ойын Самат Наурызбаев командасының үш матчқа созылған жеңілістер сериясын тоқтатты. Дегенмен «Тараз» тоғызыншы орынға түсіп қалды – оны «Қайсар» басып озды. «Ордабасы» үшінші орнын және «Тобылдан» төрт ұпайлық басымдығын сақтап қалды. Шымкенттіктерге қола жүлдені иелену үшін қалған екі турда бір жеңіс жеткілікті. Алайда алдағы «Ертіспен» кездесуде олар Шыңғыс Қожахметовсіз ойнайды – қорғаушы төртінші сары қағазын алды.
Капитан Джетенов «Тобылды» қосымша уақытта құтқарды
Қостанайда турнирлік кестеде қатар орналасқан командалардың кездесуі ұзақ уақыт голсыз өтті. Тек 59-минутта «Ақтөбе» жартылай қорғаушысы Ибрахим Бауыржанов есеп ашты. Оның еншісінде енді маусымдағы 8 гол мен 7 нәтижелі пас бар.
Қонақтар жеңіске жақын болды, алайда матчтың соңғы минуттарында «Тобыл» капитаны Руслан Джетенов есепті теңестірді – 1:1.
Қорғаушы үшін бұл маусымдағы төртінші гол болды. Бұл көрсеткіш қостанайлықтардың шабуылдағы басқа көшбасшыларымен бірдей. Айта кетейік, Джетенов – маусымдағы барлық 1800 минутты алаңда өткізген турнирдің үш футболшысының бірі. Қалған екеуі – «Ақтөбеден» Акбар Саденов және «Ордабасыдан» Нұрасыл Шералы.
Екі команда да жеңіліссіз сериясын бес матчқа жеткізді. «Тобыл» төртінші орында қалып, қола жүлдеге таласу мүмкіндігін сақтап отыр. Алайда ол үшін қостанайлықтар ұпай жинап қана қоймай, «Ордабасының» сүрінуінен де үміттенуі керек. Келесі турда Олег Лотовтың шәкірттері «Жас Қыранды» Никита Лисохмарсыз қабылдайды – қорғаушы төртінші сары қағазын алды.
28 ұпай жинаған «Ақтөбе» бесінші орында келеді және өзара кездесулер нәтижесі бойынша «Жас Қыраннан» жоғары тұр.
ҚФФ Академиясы «Астанадан» есесін қайтарды
Бірінші айналымда «Астана» өз алаңында ҚФФ Академиясын 4:0 есебімен ойсырата жеңген еді. Талғарда Юрий Мархельдің шәкірттері дәл сондай есеппен қарымта қайтарды.
Алаң иелері бірінші минутта-ақ алға шықты – команда капитаны, қорғаушы Данияр Қаси гол соқты. 21-минутта Сұлтан Дәуренов басымдықты еселеді. Ал екінші таймда Асхат Дутпаев пен команданың үздік сұрмергені Радмир Хизметов (6 гол) есепті 4:0-ге жеткізді. Қақпашы Мирдиер Мирахматов қақпасын голдан аман сақтады, ал Хизметов гол соғумен қатар екі нәтижелі пас берді.
ҚФФ Академиясы жетінші орында қалды, бірақ «Ақтөбе» мен «Жас Қыраннан» айырмасы екі ұпайға дейін қысқарды. Келесі турда команда Ақтөбеде «қызыл-ақтармен» кездеседі.
Ал «Астана» қатарынан 11 матчта жеңіске жете алмай келеді. Елордалық клуб соңғы рет дәл осы ҚФФ Академиясын бірінші айналымда ұтқан болатын. «Қайсармен» кездесуге команда Хайдар Тоғымовсыз шығады – жартылай қорғаушы төртінші сары қағазын алды.
«Қайсар» «Таразды» басып озды
Қызылордалықтар қатарынан екінші жеңісіне қол жеткізіп, «Ертісті» минималды есеппен ұтты – 1:0. Матчтағы жалғыз голды 50-минутта Сұлтанәлі Өміртай соқты.
Осы жеңістің арқасында «қасқырлар» «Тараздан» бір ұпай алға шығып, сегізінші орынға көтерілді.
15 ұпайы бар «Ертіс» 11-орында қалып отыр. Павлодарлықтар «Каспийден» өзара кездесудегі жеңісінің арқасында жоғары орналасқан. Келесі турда Виталий Чурсиннің шәкірттері өз алаңында «Ордабасыны» қабылдайды.
20-турдан кейінгі үздік сұрмерген: Дәулет Орынбасар («Қайрат», 20 гол).
20-турдан кейінгі үздік ассистент: Аян Аманжұлов («Ақтөбе», 9 нәтижелі пас).
.png)
.png)
