Freedom QJ League B 14-турының матчтары қалай өткенін баяндаймыз.
Алты гол және қосымша уақыттағы шешуші сәт
Турдың ең тартысты матчы Шымкентте өтті. «Оңтүстік» чемпионат көшбасшысын қабылдады.
Бірінші тайм қонақтардың пайдасына аяқталды: 35-минутта Ілияс Серікбаев есеп ашса, қосымша уақытта қорғаушы Ердәулет Исмаилов басымдықты еселей түсті. Алайда үзілістен кейін алаң иелері небәрі алты минуттың ішінде есепті теңестірді – Арда Мұхтаров дубль жасады.
Ойын осылай аяқталатындай көрінген, алайда соңғы минуттарда алаңға қосалқы құрамнан шыққан Нұрғиса Шәріпбай «Жеңісті» қайта алға шығарды. Астаналықтардың қуанышы бір минутқа да созылмады: көп ұзамай Асылбек Фахриддиновтың соққысы қорытынды есепті орнатты – 3:3.
«Оңтүстік» үшін (18 ұпай, алтыншы орын) бұл өте маңызды ұпай. Ал көшбасшы үшін ұпай жоғалту қымбатқа түсті.
«Хан-Тәңірі» айырманы минимумға дейін қысқартты
Алматылықтар өз мүмкіндігін пайдаланып, өз алаңында «Оқжетпесті» 2:1 есебімен жеңді.
Бірінші таймда гол соғылған жоқ, есесіне екінші таймның басы өте қарқынды өтті: 50-минутта Тимур Хван көзге түссе, 56-минутта Тимур Дешко пенальтиді дәл орындады.
Көп ұзамай қонақтар да 11 метрлік айып добынан жауап берді. Арсен Арапов мүлт кеткен жоқ. Алайда бұл «Оқжетпестің» матчтағы жалғыз голы болып қалды.
Енді «Хан-Тәңірінің» еншісінде 30 ұпай, ал «Жеңісте» – 31. 23 ұпай жинаған көкшетаулықтар үшінші орында келе жатқан «Жайықтан» бес ұпайға қалып тұр.
Дәулетұлының дублі және Оралдағы екі қызыл қағаз
«Жайық» пен «Жетісу» арасындағы тартысты кездесу 2:2 есебімен аяқталды.
34-минутта алаң иелерін капитан Дамир Залмұқанов алға шығарды. Үзілістен кейін көп ұзамай қонақтар азшылықта қалды: 49-минутта Мәди Сәлімов екінші сары қағазын алды. Бір қызығы, дәл осыдан кейін жетісулықтар ойын барысын өзгертті – Айбын Дәулетұлы үш минуттың ішінде екі рет гол соқты.
68-минутта командалардың құрамы қайта теңесті: алаң иелерінің ойыншысы Әлихан Серікұлы агрессивті әрекеті үшін тікелей қызыл қағаз алды. «Жайықты» жеңілістен қосалқы құрамнан шыққан Вадим Курилин құтқарды – ол 85-минутта есепті теңестірді.
Дубльдің арқасында Дәулетұлы сұрмергендер жарысында екінші орынға көтерілді – «Жетісу» шабуылшысының еншісінде сегіз гол. «Жайық» биылғы маусымда жетісулықтарды әлі жеңе алған жоқ – бірінші айналымда команда 0:1 есебімен ұтылған еді.
«Елімай» жеңілістер сериясын тоқтатты
Семейдегі матч алаң иелерінің «Қызылжарды» 4:2 есебімен жеңуімен аяқталды. Үзіліске дейін «Елімай» Даниял Төлеубаев, Анас Әділханов және Мирас Ғылымбековтің голдарының арқасында 3:0 есебімен алда тұрды. 52-минутта Вадим Сайбель пенальтиді сәтті орындады. Бұдан кейін қонақтар Дияр Бағыт пен Егор Лавренконың голдарымен жауап берді, бірақ есепті теңестіре алмады.
Бұл семейліктердің қатарынан бес жеңілістен кейінгі алғашқы үш ұпайы болды. Сонымен қатар «Елімай» турнирде бірде-бір рет тең ойнамаған жалғыз клуб болып отыр – 14 матч, бес жеңіс және тоғыз жеңіліс.
«Алтай» Атыраудан бір ұпай алып қайтты
Чемпионат аутсайдері ұпай қорын толықтыруды жалғастыруда. Атыраудағы матчтың 51-минутында қонақтар есеп ашты – Әбілмансұр Манабаев гол соқты. Төрт минуттан кейін «мұнайшылардың» капитаны Аян Ғарипулла таразы басын теңестірді, бірақ бұдан кейін гол соғылған жоқ. 1:1.
Матч соңында алаң иелері он ойыншымен қалды: 89-минутта Руслан Төленді екінші сары қағазын алды. Бір қызығы, командалардың осы маусымдағы екі кездесуі де бірдей есеппен аяқталды.
«Атырау» 16 ұпаймен жетінші орында, ал «Алтай» (6 ұпай) әлі де турнир кестесінің соңғы сатысында тұр.
Маусымның аяқталуына төрт тур қалды
Чемпиондық жарыс шешуші кезеңге жетті: «Жеңіс» (31), «Хан-Тәңірі» (30) және «Жайықты» (28) небәрі үш ұпай бөліп тұр. Оның үстіне екінші айналымда екі көшбасшы Алматыда өзара кездеседі. Еске салайық, бірінші матчта «Жеңіс» 5:1 есебімен жеңіске жеткен еді.
14-турдан кейінгі үздік сұрмерген: Жанәді Жұмабек («Хан-Тәңірі», 9 гол).
14-турдан кейінгі үздік ассистент: Нұралы Сабыржан («Оқжетпес», 5 нәтижелі пас).
