Алматыда Freedom QJ League дәстүрлі көрме Жұлдыздар матчы өтті.
U-18 турнирінің үздік жасөспірім футболшыларынан құралған құрама бай тарихы мен беделді академиясы бар Германияның ірі клубы – Менхенгладбахтың «Боруссия» академиясының тәрбиеленушілерімен кездесті.
Лиганың әрбір спорттық іс-шарасының өзіндік бірегей концепциясы бар. QJL All Star 2026 матчының басты идеясы «Сенің ұшқының. Біздің жалынымыз» деген тіркеспен көрініс тапты. Сондықтан ашылу салтанаты, үзілістегі шоу және afterparty-дегі қойылым қонақтарды нағыз от қолданылған жарқын перформанстармен таңғалдырды.
Әдеттегідей, трибунаның артында қонақтарды түрлі матч алдындағы белсенділіктер күтіп тұрды. Олардың қатарында фотоға түсу мүмкіндіктері, VR және AR аттракциондары, аниматорлардың өнер көрсетуі, тамақтану нүктелері және серіктестер – COPA.KZ мен Changan Kazakhstan-ның арнайы аймақтары болды. Барлық ойын-сауық кештің «жалынды» концепциясына сай таңдалды.
Бастапқы ысқырыққа дейін Қазақстан футбол федерациясының бас хатшысы Скотт Манн, «Боруссия» директорлар кеңесінің мүшесі әрі клубтың аңыз қақпашысы Уве Кампс, Changan Kazakhstan дистрибуция директоры Денис Коломацкий және Лига президенті Рохус Шох құттықтау сөз сөйледі.
Футболға сіңірген айрықша еңбегінің құрметіне Германиядан келген екі қонаққа – Уве Кампс пен «Боруссия» бапкерлер штабының мүшесі, Еуропа чемпионы және әлем вице-чемпионы Кристиан Цигеге қазақтың шапандары табысталды.
Бұл ретте «қара-ақ-жасылдардың» вице-президенті құнды сыйлықты Евгений Яровенконың қолынан алды – Уве Кампс ГФР құрамасымен 1988 жылғы Олимпиаданың қола жүлдегері атанған еді. Дәл сол Олимпиадада Лига амбассадоры жеңіске жеткен болатын.
Тең ойын және көптен күткен жеңіс
Ринат Жиембеков командасының бастапқы құрамында Камиль Гайнуллин (капитан), Ислам Ракым, Альфир Ханафи, Меирлан Балтабаев, Мансур Авасханов, Дамир Юсупбеков, Алихан Жумабек, Марлен Амренов, Расул Акимов, Сергей Шарунов және Даулет Орынбасар алаңға шықты.
Ал «Боруссияның» бапкерлер штабы Максимилиан Кванте, Джоэл Увахонье, Нильс Хагедорн, Максим Лагос, Озан Сулаксу, Пит Заутнер (капитан), Салих Юша Джаным, Иван Чалета, Феликс Шлёссер, Кенни Вестйенс және Алдрин Асаниге сенім артты.
Трибунаға жиналған түрлі жастағы 3 055 жанкүйер QJL All Star құрамасын алға белсенді түрде жігерлендірді. Алайда Қазақстанға келген команда «Боруссия» футбол мектебінің жоғары деңгейін және ойыншыларының мықты жеке шеберлігін дәлелдеді – оның құрамында түрлі елдердің жасөспірімдер құрамаларының футболшылары да өнер көрсететіні бекер емес.
Ойын тең дәрежеде өтіп, көрермендер ойыннан соғылған гол көрмеді. Алаң иелерінде есеп ашуға жақсы мүмкіндіктер болды, алайда «Боруссияның» қорғанысы, соның ішінде қақпашысы да қауіптерге сенімді тойтарыс берді. Қазақстандықтардың қорғанысы да өз міндетін жақсы орындады.
Сондықтан спорттық драманың шарықтау шегі матчтан кейінгі пенальти сериясына тұспа-тұс келді. Жүйкеге салмақ салған текетіресте сәттілік QJL All Star жағында болды – 6:5.
QJL All Star құрамындағы үздік футболшы болып «Қайраттың» жартылай қорғаушысы Ислам Ракым танылды. Қонақтар сапында жеке жүлдеге Пит Заутнер ие болды.
Еске салайық, бір жыл бұрын мадридтік «Атлетикоға» қарсы матчта да жеңімпаз 11 метрлік соққылар сериясында анықталған еді. Ол кезде негізгі уақыт 1:1 есебімен аяқталып, QJL All Star сапындағы голды «Астананың» вингері Максат Абраев соққан болатын. Ол жуырда елордалық клубтың негізгі құрамында еурокубоктарда дебют жасады. Алайда бір жыл бұрын пенальти сериясындағы жеңісті Испаниядан келген қонақтар тойласа, бұл жолы Қазақстан құрамасы жеңіске қол жеткізді.
Болашаққа көзқарас
Өткен ойын – Лига мен «Боруссия» арасындағы ұзақмерзімді, нәтижелі және өзара тиімді ынтымақтастықтың алғашқы қадамы ғана.
Болашақ серіктестіктің ықтимал бағыттарының қатарында тәжірибе алмасу, жолдастық турнирлер, скаутингтік бастамалар, Лигаға қатысушы командалардың ойыншылары мен бапкерлерінің Германияда тағылымдамадан өтуі, сондай-ақ «Боруссия» мамандарының спорттық-аналитикалық блоктың оқыту семинарларына қатысуы бар. Бұдан бөлек, тағы бір жолдастық матчты Германияда өткізу мүмкіндігі қарастырылуда.
Енді құрама ойыншылары мен бапкерлері өз клубтарына оралады – Freedom QJ League келесі аптада қайта жалғасады.
QJ League All Star 2026-ны ұйымдастыруға Лиганың бас серіктесі Freedom Holding, сондай-ақ Astana Motors компаниялар тобына кіретін премиум-серіктес Changan Kazakhstan, Қазақстан футбол федерациясы, Mastercard, SCAT Airlines, JAKO, COPA.KZ және ЮНИСЕФ белсенді атсалысты.
