Голдарға толы тур және алғашқы тең ойын: Freedom QJ League W-дің 5-турына шолу

Алматыдағы «Күлбикештер» ертегісінің күйреуі

«Қайрат» «Шахтерге» ешқандай мүмкіндік қалдырмады – Тимур Сегізбаев атындағы стадионда өткен матч «сары-қаралардың» 7:0 есебімен аяқталды. Саида Дюсембаева мен Дамира Максаттың дуэті маусымда алғаш рет голсыз қалса, Жания Махаш пен Ангелина Кленова өздерін керемет қырынан көрсетті – әрқайсысы бес нәтижелі әрекетпен көзге түсті.

Қызығы, алматылық команданың барлық негізгі ойыншылары матчты толық өткізсе, Сергей Поленов ойында жеті бірдей ауыстыру жасады – алайда олардың ешқайсысы ойын тағдырына әсер ете алмады.

Қазіргі таңда турнир кестесінде үшінші орынға жайғасқан «Шахтер» командасының доп айырмашылығы теріс болып тұр. Дегенмен бұл көрсеткіш олардың жүлделі орындар үшін күресіне айтарлықтай әсер етпей тұр – «Тобыл» мен «Ертіс» қарағандылықтардан небәрі екі ұпайға қалып келеді.

Айта кетейік, бұл матч «Шахтер» үшін «джокерсіз» өткен алғашқы кездесу болды – 2008 жылғы футболшы қыздар аға команда қатарына ауыстырылған.

«Астана» қайта жеңісті жолға түсті

Астаналық команда мүмкіндікті мүлт жібермей, «Қайраттың» басты қуғыншысы ретіндегі орнын нықтай түсті. Бұл нәтиже «Ордабасыға» қарсы кездесуден кейін тіркелді – матчтың тағдырын Зарема Максот, Софья Рыбак және Жібек Марат шешті. Шымкенттік команда тек Адина Шуренованың пенальтиден соққан голымен ғана жауап қайыра алды.

Бұл – «Ордабасы» үшін қатарынан үшінші жеңіліс. Айта кетерлігі, бұл жолы да шымкенттіктер жүлделі үштікте тұрған командалардан ұтылып отыр.

Әйелдер турниріндегі алғашқы тең ойын!

Freedom QJ League W алғашқы маусымында бес турда 20 матч өтті – солардың тек біреуі ғана тең аяқталды. Бұл нәтиже турнирлік кестеде қатар орналасқан қос команда – «Тобыл» мен «Ертіс» арасындағы Қостанайда өткен ойында тіркелді.

56-минутта Диана Нұрқабаева алыстан соққы жасап, қақпашыны қапы қалдырды – осылайша қостанайлықтар есеп ашты. Барлығы осы күйде аяқталардай көрінгенімен, 85-минутта Елизавета Медведева «Ертісті» жеңілістен құтқарып қалды. Қос команда да турнирлік кестенің дәл ортасында орналасуын жалғастыруда.

Айта кету керек, бұл Нұрқабаеваның Freedom QJ League-дағы небәрі екінші матчы. «Тобылдың» джокері негізінен ересектер командасында ойнайды. «Ертіске» қарсы матчтан кейін оның статистикасы – 136 минутта 2 гол.

Еске сала кетейік, бұл ойында қостанайлық команданың көшбасшыларының бірі – «Ақтөбемен» болған төбелеске қатысқаны үшін қызыл қағаз алған Амура Қарабаева алаңға шыққан жоқ.

Талдықорғандағы триллер

Еске салайық, бесінші турда бірде-бір ұпай жинай алмаған екі команда – «Жетісу» мен «Ақтөбе» өзара кездесті. Бұл матч қос клубтың жанкүйерлері үшін нағыз эмоционалды серпіліс болды – ойын қарқынды өтіп, голдарға бай болды.

Бастапқыда «Ақтөбе» жеңісті оңай алып кететіндей көрінді – 9-минутта-ақ Даяна Төлебаева мен Әзиза Талаптың голдарының арқасында қонақтар 2:0 есебімен алға шықты.

Алайда көп ұзамай Нұрай Болатова басты кейіпкерге айналды. «Жетісу» жартылай қорғаушысы үзіліске дейін бір гол соғып, Айнұр Ануарбекке нәтижелі пас шығарды. Екінші таймда ол өз өнерін жалғастырды: 50-минуттағы голымен «жетісулықтарды» алғаш рет алға шығарды – 3:2.

Алайда бұл басымдық ұзаққа созылмады. Алдымен Әзиза Талап тағы екі гол соқты, артынша Гүлден Сакирова мен Аружан Бижанова да мергендік танытып, «Ақтөбеге» сенімді жеңіс сыйлады. Дегенмен Болатова матчта хет-трик жасап, соңғы ысқырық кезінде табло 4:6 есебін тіркеді – «қызыл-ақтардың» пайдасына.

Қазіргі уақытта «Жетісу» командасының еншісінде жеті гол бар – оның төртеуін Нурай Болатова соқса, тағы біреуіне нәтижелі пас берген.