Қыздар турнирінің өткен матчтарындағы басты оқиғаларды назарларыңызға ұсынамыз.
«Астана» алғаш рет ұпай жоғалтты
Чемпионат көшбасшысы өз алаңында сенсациялық түрде «Ордабасыны» жеңе алмады – 2:2.
Осы маусымда әлі жеңіске жетпеген шымкенттік команда алғашқы үш ұпайына өте жақын болды. Аруна Насирали 15 және 81-минуттарда гол соғып, қонақтарды екі рет алға шығарды. Бірінші жағдайда «Астана» Софья Рыбактың голының арқасында есепті теңестірсе, 90-минутта Асыл Пазыл алаң иелерін жеңілістен құтқарып қалды. Екі голға да Жібек Марат нәтижелі пас берді.
Елордалық команда 13 ұпаймен бірінші орнын сақтап қалды, алайда «Қайраттан» басымдығы бір ұпайға дейін қысқарды. Ал «Ордабасы» маусымдағы үшінші тең нәтижесін қатарынан тіркеп, үш ұпаймен жетінші орында тұр.
«Қайраттың» тартысты жеңісі
«Сары-қаралар» қарсыласының сүрінуін тиімді пайдаланып, Павлодарда «Ертісті» 3:2 есебімен жеңді. Дегенмен бұл үш ұпай «Қайратқа» оңайлықпен келген жоқ.
Бір сәтте қонақтар үш доп айырмасымен алда тұрды. 8-минутта Милена Николенко есеп ашты, көп ұзамай Айиша Улуханова мергендік танытты, ал үшінші голды бұған дейін нәтижелі пас берген София Ягудина соқты.
Матчтағы интрига аяқталғандай көрінді, алайда алаң иелері бұлай ойлаған жоқ. Алдымен Валерия Косарева 74-минутта пенальтиді дәл орындады, ал ойын соңында Регина Хамитова есеп айырмасын минимумға дейін қысқартты. «Ертіске» үшінші голды соғуға уақыт жетпеді.
12 ұпай жинаған «Қайрат» «Астанадан» бір ұпай ғана қалып келеді және 20 голмен турнирдегі ең нәтижелі команда болып отыр. Соңғы минуттардағы қарқынына қарамастан, «Ертіс» бір ұпаймен турнир кестесінің соңғы орнында қалды.
«Шахтердің» алғашқы жеңілісі
Тағы бір сенсация Ақтөбеде тіркелді. «Қызыл-ақтар» «Шахтерді» 4:2 есебімен жеңіп, маусымның басты тосынсыйларының біріне алғашқы жеңілісін әкелді.
Қонақтар есепте екі рет алға шықты. Алдымен оларға Арай Тілегенованың автоголы көмектесті. Алуа Қалиева есепті теңестіргеннен кейін Мария Мамонтова «Шахтерді» қайта алға шығарды. Жартылай қорғаушы үшін бұл маусымдағы төртінші гол болды.
Алайда кездесудің соңғы бөлігі алаң иелерінің пайдасына шешілді: 69-минуттан 74-минутқа дейін «Ақтөбе» үш гол соқты. Айжан Есіркепова дубль жасаса, тағы бір допты Алия Самат енгізді. Тілегенова да автоголдан кейін нәтижелі пас беріп, өз қатесін түзете алды.
Жеке кездесудегі жеңісінің арқасында «Ақтөбе» «Шахтерді» басып озып, үшінші орынға көтерілді. Екі команданың да еншісінде сегіз ұпайдан бар.
Қостанайдағы ірі жеңіс
«Тобыл» «Қайсарға» еш мүмкіндік қалдырмай, 5:0 есебімен жеңіске жетті.
Турнирдегі алғашқы голдарын соққан Варвара Цой дубль жасады. Ясмина Мантулина, Алина Сартаева және команда капитаны Амура Карабаева бір-бір голдан енгізді.
Қостанайлық команда жеті ұпай жинап, бесінші орында тұр. Ал «Қайсар» маусымдағы төртінші жеңілісіне ұшырады. Бір қызығы, қызылордалықтар осы төрт матчтың барлығында дәл бес голдан жіберген. 22 гол өткізген команда турнирдегі ең осал қорғанысқа ие.
5-турдан кейінгі үздік бомбардир: Милена Николенко («Қайрат», 5 гол).
5-турдан кейінгі үздік ассистенттер: Жібек Марат («Астана») және София Ягудина («Қайрат», 4 нәтижелі пастан).
.webp)
