Freedom QJ League B тоғызыншы турының матчтары қалай өткенін баяндаймыз.
«Жеңіс» қайтадан көш басында
Елордалық команда өз алаңында «Жетісуды» 3:1 есебімен жеңіп, маусымдағы жетінші жеңісіне қол жеткізді.
Барлық гол екінші таймда соғылды. 64-минутта Алихан Туманбаев қонақтарды алға шығарды, алайда Марат Зайнудиновтың командасы 13 минуттың ішінде үш рет мергендік танытып, үш ұпайға ие болды. Алаң иелері сапынан Нураби Нурлан, Жаннур Малтықбай және Илияс Серікбаев гол соқты, ал Ердәулет Исмаилов екі нәтижелі пас берді.
«Жеңіс» «Жайықты» ығыстырып, турнир кестесінің бірінші сатысына көтерілді. Ал 13 ұпайы бар «Жетісу» бесінші орында қалды.
«Жайықтың» Көкшетаудағы камбэгі
Турды көшбасшы ретінде бастаған «Жайық» Көкшетаудан бір ұпаймен ғана қайтты. «Оқжетпеспен» өткен матч 2:2 есебімен аяқталды.
Алаң иелері бірінші таймда-ақ екі доптық басымдыққа ие болды. 5-минутта Даниил Семенюк есеп ашса, 29-минутта Нұралы Сабыржан басымдықты еселеді. Турнирдің үздік ассистенттерінің бірі бұл жолы голды өзі соқты.
Алайда үзілістен кейін оралдықтар ойын барысын өзгертті. Алдымен Нұржан Шүкенов Рами Жақсылықтың пасынан есеп айырмасын қысқартты, ал 89-минутта Илияс Бекмұханов пенальтиді сәтті орындады.
«Жайық» екінші тур қатарынан тең ойнап, 20 ұпаймен екінші орында тұр. Команда «Жеңістен» бір ұпай қалып келеді. 14 ұпай жинаған «Оқжетпес» төртінші сатыда орналасқан. Көкшетаулықтар үшін де бұл қатарынан екінші тең нәтиже болды.
Жұмабек «Хан-Тәңірін» құтқарып қалды
Атыраудағы матч қызық жағдаймен басталды: бірінші минутта-ақ «Хан-Тәңірінің» қорғаушысы Ильяс Шүкебаев өз қақпасына гол соғып алды.
Қонақтар тек 74-минутта есепті теңестірді. Турнирдің үздік бомбардирі Жанәді Жұмабек маусымдағы сегізінші голын соқты. Қорытынды есеп – 1:1. Бұл турдағы тағы бір тартысты тең ойын болды.
Алматылық команда үш тур қатарынан жеңіске жете алмай келеді және 17 ұпаймен көшбасшыдан төрт балл қалып тұр. «Атыраудың» жеңіссіз сериясы бес матчқа дейін созылды. Команда тоғыз ұпаймен сегізінші орында орналасқан.
«Оңтүстіктің» жүйкеге салмақ түсірген жеңісі
Шымкенттік команда «Елімаймен» матчта жайлы басымдығын жоғалтып ала жаздады, бірақ 3:2 есебімен жеңісті сақтап қалды.
Үзіліске дейін есеп ірі жеңіске қарай бет алған еді. Алдымен Асилбек Фахриддинов пен Диярбек Откурбаев екі минуттың ішінде екі гол соқты. Екі жағдайда да Альзаир Раис нәтижелі пас берді. Кейін Умиджон Миралиев пенальтиді дәл орындады – 3:0. Алайда екінші таймда семейлік қонақтар есеп айырмасын күрт қысқартты. 52-минутта Санжар Бекенов маусымдағы алтыншы голын соқса, 58-минутта Вадим Сайбель төртінші рет мергендік танытты. Бұдан кейін есеп өзгерген жоқ.
Турнирдің екі дүркін чемпиондары үш матч қатарынан жеңілмей, 13 ұпаймен «Жетісуды» қуып жетті. «Елімай» маусымдағы бесінші жеңілісіне ұшырап, шымкенттіктерден кейінгі жетінші орында тұр.
«Қызылжардың» екінші жеңісі
«Қызылжар» Өскеменде «Алтайды» 2:0 есебімен жеңіп, үш ұпайға ие болды. 18-минутта Роман Комаровский есеп ашты, ал матч соңында Абзал Серік қонақтардың жеңісін нықтады.
Бұл «Қызылжардың» маусымдағы екінші жеңісі ғана. Солтүстікқазақстандықтар сегіз ұпаймен тоғызыншы, яғни соңғының алдындағы орында тұр. Ал «Алтай» турнирде әлі жеңіске жетпеген жалғыз команда болып қалды. Тоғыз турдан кейін оның еншісінде бір ғана ұпай бар.
9-турдан кейінгі үздік бомбардир: Жанәді Жұмабек («Хан-Тәңірі», 8 гол).
9-турдан кейінгі үздік ассистенттер: Нұралы Сабыржан және Әбілмансұр Хамит (екеуі де – «Оқжетпес», 4 нәтижелі пастан).
.webp)
