Флагмандық турнирдің кезекті туры мәресіне жетті.
«Қайрат» кем құрамда жеңіске жетті
Чемпионат көшбасшысы бірінші айналымды тамаша аяқтап, 11 матчтың барлығында жеңіске жетті. Бұл жолы «Тараз» 3:1 есебімен жеңілді.
Кездесуді белгілі бір дәрежеде аттас ойыншылардың дуэлі деуге болатын еді. 23-минутта «Қайрат» шабуылшысы Даулет Орынбасар пенальтиден есеп ашты. Алайда алаң иелерінің форварды Ернур Орынбасар үзіліске дейін таразы басын теңестірді.
Дегенмен екінші таймда Даулет тағы бір гол соқты – бұл жолы ойын барысынан ерекшеленді. Көп ұзамай Роман Черноморец те мергендік танытып, қорытынды есепті белгіледі. Енді алматылықтардың екі шабуылшысының да маусымдағы гол саны 10-ға жетті.
Алайда кездесудің соңы «Қайрат» үшін сәтті бола қойған жоқ. Алаңға қосалқы құрамнан шыққан Нилеш Шарма небәрі үш минуттан кейін тікелей қызыл қағаз алды. Ал қосымша уақытта Алихан Абди екінші сары қағазын көрді. Осылайша, «сары-қаралар» матчты тоғыз ойыншымен аяқтады.
Нәтижесінде «Тараз» қатарынан төртінші рет жеңіліп, оныншы орында қалды.
«Кеншілер» жеңіс жолына оралды
Өткен турда маусымдағы алғашқы жеңілісіне ұшыраған «Шахтер» өз алаңында «Жас Қыранды» 2:0 есебімен сенімді жеңді.
Артём Алексеев 4-минутта-ақ есеп ашты. Екінші таймда Нурхан Кагазбаев қарағандылықтардың басымдығын еселеді. Қонақтар жауап голын соға алмады.
«Шахтер» 26 ұпаймен екінші орында келеді және «Қайраттан» жеті ұпайға қалып тұр. «Жас Қыран» қатарынан төрт тур бойы жеңіске жете алмаса да, төртінші орнын сақтап қалды.
Турдах «Ордабасыға» жеңіс әкелді
Шымкенттік команда сырт алаңда «Астананы» 4:1 есебімен ойсырата жеңіп, қатарынан үшінші жеңісіне қол жеткізді.
Үзіліске дейін «Ордабасы» екі доп айырмасымен алда тұрды. Голдарды Эльдар Калмаханбек пен Адият Отарбек соқты, ал екі нәтижелі пасты да Адилбек Турдах берді. Кездесудің соңына қарай Турдахтың өзі маусымдағы жетінші голын соқты. Амандык Хамидуллин пенальтиден бір доптың қарымтасын қайтарғанымен, соңғы сөз қонақтарда қалды: қосымша уақытта Жандос Досхал Турдахтың тағы бір пасынан кейін мергендік танытты.
«Ордабасы» 20 ұпай жинап, жүлделі үштіктегі орнын нығайтты. 14 ұпайы бар «Астана» енді жетінші орында орналасқан.
Ақтөбедегі сегіз гол
Турдың ең тартысты матчы Ақтөбеде өтіп, «қызыл-ақтар» мен «Қайсар» нәтижелі тең ойын көрсетті.
Аян Аманжулов 5-минутта-ақ алаң иелерін алға шығарды. 29-минутта Нурым Талгат есепті теңестірді, ал бірінші таймның соңында Бикжан Жанаев «Ақтөбеге» қайтадан басымдық сыйлады.
Үзілістен кейін Мади Женисулы қысқа уақыт аралығында дубль жасап, қызылордалықтарды алға шығарды. Алайда көп ұзамай Ибрахим Бауыржанов есепті теңестірді. 71-минутта Аманжулов өзінің екінші голын соғып, «қызыл-ақтарды» тағы да алға бастады.
Матчтың шешуші сәттері драмалық сипат алды. 78-минутта «Ақтөбе» қақпашысы Абдуррахман Танатаров Султанали Умиртайдың пенальтиін қайтарды. Бірақ арада екі минут өткенде Ернар Парда есепті теңестірді – 4:4.
«Ақтөбе» 16 ұпаймен бесінші орында, ал «Қайсар» 12 ұпаймен сегізінші сатыда тұр.
«Тобылдың» ерлігі
Қостанайлықтар бір сағаттан астам уақыт бойы кем құрамда ойнап, өз алаңында ҚФФ академиясын 2:1 есебімен жеңді.
Матч алаң иелері үшін өте сәтсіз басталды. 13-минутта қонақтардың жартылай қорғаушысы Радмир Хизметов пенальтиді сәтті орындады. Ал 31-минутта қорғаушы Риза Жумагул тікелей қызыл қағаз алды.
Соған қарамастан, он ойыншымен қалған «Тобыл» матч соңында ойын барысын өзгерте алды. 86-минутта Руслан Джетенов есепті теңестірсе, қосымша уақыттың үшінші минутында алаңға қосалқы құрамнан шыққан Ильяс Багитжан командасына жігерлі жеңіс сыйлады.
«Тобыл» 15 ұпай жинап, «Астананы» басып озды және үздік алтылықты түйіндеп тұр. 11 ұпайы бар ҚФФ академиясы тоғызыншы орында.
«Ертістің» көптен күткен жеңісі
Павлодарда алаң иелері Амирхан Куанның голынан кейін «Каспийге» есе жіберіп жатты. Алайда кездесудің соңғы бөлігінде үш рет мергендік танытып, 3:1 есебімен жеңіске жетті.
Камбэктің басты қаһарманы Мадияр Есен болды. Алдымен ол 75-минутта есепті теңестірді. Кейін Ярослав Колесник пен қосалқы құрамнан шыққан Руслан Литуновскийге екі нәтижелі пас берді. Үшінші гол қосымша уақытта соғылды.
«Ертіс» 8 ұпай жинап, турнир кестесінің соңғы орнынан көтерілді. Бұл – Виталий Чурсин шәкірттерінің маусымдағы екінші жеңісі ғана. Ал маусымдағы тоғызыншы жеңілісіне ұшыраған «Каспий» павлодарлықтардың орнына соңғы сатыға түсті.
11-турдан кейінгі үздік сұрмерген: Расул Акимов («Шахтер») – 12 гол.
11-турдан кейінгі үздік ассистенттер: Аян Аманжулов («Ақтөбе»), Адилбек Турдах («Ордабасы») және Амандык Хамидуллин («Астана») – 5 нәтижелі пастан.
.webp)
