Бауыржан Сағындық: «Ойыншылардың жеке дамуы – ССБ-нің жаңа стратегиялық басымдығы»

– Лига мен спорттық-сараптамалық бөлімнің үш жылдық жұмысында матчтар мен ойыншыларды бақылау бойынша ауқымды жұмыс атқарылды. Мамандарымыз клубтарға тұрақты түрде барып, өңірлерде көптеген оқыту семинарларын өткізді. Жаттықтырушыларға арналған FF Manager цифрлық платформасы әзірленіп, іске қосылды – ол қысқа уақыт ішінде маңызды құралға айналып, кәсіби ортада мойындалды.

Жаңа үш жылдық циклде біз жұмыс стратегиясын жаңартуды жоспарлап отырмыз. Біріншіден, жаһандық сүйемелдеуден ойыншылардың жеке дамуына көшеміз. Аймақтық сарапшы-координаторлар клубтармен тығыз жұмыс істеп, тікелей жергілікті деңгейде де белсенді болады.

Екінші маңызды өзгеріс – Лига футболшыларының физикалық көрсеткіштерін зерттеуге ерекше назар аудару. Бұған дейін командалардың модельдік сипаттамаларын анықтау басымдық болса, енді бұл критерийлерді ойыншылар деңгейінде қалыптастыруға көңіл бөлеміз.

Біз бұл көрсеткіштерді тұрақты бақылап, дарынды жас футболшылардың Лигада қалай дамып жатқанын, әр клубтағы жаттығу процесінің оларға қалай әсер ететінін терең талдаймыз. Осы деректер негізінде клубтарға ойыншыларды дамыту бағдарламасын жоспарлау бойынша ұсыныстар береміз. Нәтижесінде клубтардың өзі де ойыншыларды сапалы даярлауға мүдделі болады.

Бұл қадам турнирлеріміздің деңгейіне де оң әсер етеді деп сенеміз: жаңа жұлдыздар, жеке шеберлігі жоғары ойыншылар пайда болады. Ал Лига күшейсе, ұлттық құрамалар да күшейеді.

Қазіргі таңда біз кешенді тестілеу жүргізіп, мәліметтерді клубтарға жіберіп жатырмыз. Олар өз ойыншыларының әлеуетін бағалап, қорытынды шығарады. Осы бағалар негізінде әрі қарайғы қадамдарды клубтармен бірлесіп анықтаймыз.

Әрине, командалық көрсеткіштерді талдауды да назардан тыс қалдырмаймыз.

– Жаңа бағытты ескере отырып, клубтар мен ойыншылар ССБ қолдауын қаншалықты тең дәрежеде алады?

– Біздің ұстаным: футбол орталықтарына әдістемелік көмек, аналитикалық деректер ұсынып, бағыт беру. Осы арқылы олар өздерінің перспективалы ойыншыларына басымдық бере алады. Әр клуб футболшылармен жұмыс істеуге мүдделі болып, жеке даму бағдарламаларын әзірлеуі тиіс.

Әр клубтың өз философиясы, ойын моделі, инфрақұрылымы бар. Біз осы ерекшеліктерді ескере отырып қолдау көрсетеміз. Біздің міндет – нұсқау беру емес, кемшіліктерді көрсетіп, қолда бар мүмкіндіктер арқылы дамуды күшейту жолдарын ұсыну.

– Блок құрамындағы өзгерістер туралы айтып өтсеңіз.

– Команда шамамен 80%-ға жаңарды. Жаңа мамандар шақырылды. Мысалы, Алексей Щиголев кешенді тестілеу мен «Болашақ бапкері» жобасына жауап береді. Александр Князев «Болашақ ойыншы» жобасының кураторы болды. Канат Мұсатаев оңтүстік өңір бойынша клубтарымен жұмыс істейді.

Сонымен қатар тәжірибелі сарапшылар да сақталды. Евгений Яровенко өңірлік жұмысты үйлестіріп, тәжірибесімен бөліседі. Жанна Мальгаждарова қыздар командаларымен жұмысты жетекшілік етеді.

Командаға жас мамандар да қосылды – олардың әлеуеті жоғары және қысқа уақытта өз деңгейін көрсетті.

Турнирлер, матчтар, командалар мен ойыншылар саны артқан сайын біздің бөлім де өсіп келеді. Біз санмен қатар сапаға да мән береміз: бізге процесте белсенді, Лиганы дамытуға дайын мықты мамандар қажет.

– Алдағы маусымдағы негізгі мақсаттар қандай?

– Ең алдымен, «Болашақ бапкері» және «Болашақ ойыншы» жобаларын жүзеге асыру. Осы бағдарламалар арқылы іріктелген қатысушылар QJL All Star матчына қатысады.

Сондай-ақ жыл бойы барлық клубтарды фитнес-тестпен қамтып, жаттықтырушыларға кемінде екі семинар өткіземіз. Сонымен қатар кешенді тестілеу, жаттықтырушыларды бағалау, олардың жұмысын мониторингтеу және ойыншылардың ойын белсенділігін талдау да басым бағыт болады.

Ұзақ мерзімді мақсат – үш жыл ішінде фитнес-көрсеткіштер негізінде үлкен деректер базасын қалыптастыру.

Биыл Лигаға U-15 командалары қосылады. Бұл санат төрт маусым бойы біздің жүйеде ойнап, олардың дамуын толық бақылауға мүмкіндік береді. Сондықтан U-15 пен U-16 – басым бағыт. Бірақ U-17 және U-18 командалары да назардан тыс қалмайды.

– Цифрландыру қалай дамып жатыр?

– Бұрын біз көбіне командалық әрекеттерді талдадық. Енді жеке көрсеткіштерге басымдық береміз. Бұрын Wyscout пен Hudl қолдансақ, енді Pixellot «ақылды» камераларын пайдаланамыз.

Бұл камералар Лига А стадиондарына орнатылған. Сонымен қатар GPS-трекерлер арқылы ойыншылардың жүктемесін өлшейміз.

Биыл OVR Performance платформасын енгіздік – ол фитнес-тестілеуді жоғары дәлдікпен жүргізуге мүмкіндік береді. Жыл бойы бірнеше рет өлшеу жүргізіліп, динамика бақыланады.

Қазіргі таңда бұл деректер тек САБ мамандары мен клубтарға қолжетімді. Болашақта бұл жүйе ұлттық құрамалар үшін де маңызды құралға айналады.

– Қорытындылай келе, жаңа маусымға дайындық қалай?

– Лига командасы үлкен жұмыс атқарды. Біз жаңа маусымға дайынбыз және болашаққа сеніммен қараймыз. Биыл цифрлық экожүйенің негізін қалаймыз, бұл жаттықтырушылар мен ойыншылардың әлеуетін толық ашуға мүмкіндік береді.