Freedom QJ League 2025 үздік бапкері: лонг-листке кім енді

Естеріңізге сала кетейік, әр марапат Қазақстан футболының танымал тұлғаларының құрметіне аталған. Маусымның үздік бапкеріне берілетін сыйлық Георгий Хутиди есімімен аталады.

Георгий Хутиди – көптеген танымал қазақстандық футболшыларға жол ашқан, Қазақстан Республикасының еңбек сіңірген жаттықтырушысы.

1970-жылдары негізгі кәсіби қызметімен қатар балалар мен жасөспірімдер командаларын жаттықтырды. Оның шәкірттерімен бірге Қазақ КСР чемпионатын бірнеше рет жеңіп, «Былғары доп» турнирінің финалдық кезеңдеріне жолдама алып, КСРО-ның үздік алты командасының қатарына тұрақты түрде еніп жүрді.

25 жыл бойы Жамбыл мемлекеттік дене шынықтыру институтының студенттік командасын жаттықтырды. Бұл команда екі рет Қазақ КСР Кубогын, сондай-ақ дене шынықтыру ұжымдары арасындағы республика чемпионатын жеңіп алған. 1982 жылы Тбилисиде өткен бүкілодақтық студенттер ойындарында қола жүлдегер атанды.

Ол Антон Шох, Вахид Масудов, Дмитрий Огай, Қайрат Айманов және басқа да көптеген қазақстандық футбол жұлдыздарын тәрбиелеп шығарды.

Кейінірек өндірістік басшы бола жүріп, Таразда «Монтажник» атты балалар мен жасөспірімдерге арналған футбол мектебін құрды. Өз қаражатына балалар жаттығатын стадион салды. Бұл мектептен «Тараз» футбол клубына бірқатар ойыншылар дайындалып шықты, олардың ең танымалы – Еркебұлан Сейдахмет.

Бес жыл бойы ҚФФ Атқару комитетінің мүшесі болды. Қазақстан футболын дамыту мен жас ойыншыларды тәрбиелеудегі көпжылдық еңбегі үшін Қазақстан Республикасының еңбек сіңірген жаттықтырушысы атағын алды.

Георгий Хутиди жетістігінің бірегейлігі – ол кәсіби футбол клубтарында жұмыс істемей, арнайы спорттық білімі болмаса да бұл атаққа ие болған жалғыз бапкер. Бапкерлік оның негізгі мамандығы болмағанымен, еңбегі арқасында көптеген танымал футболшылардың спорттағы жолы басталды.

2023 жылы маусымның үздік бапкері атағын «Ақтөбе» командасының жаттықтырушысы Максим Габунов жеңіп алған еді. Келесі маусымда бұл марапат «Қайрат» клубының бапкері Русланжан Раимбакиевке бұйырды.

Биылғы лонг-листке бес маман енді: Игорь Солошенко («Шахтер»), Ринат Жиенбеков («Ақтөбе»), Ербол Мұсабаев («Астана»), Оксана Коханная («Қайрат») және Искандар Геймат («Ордабасы»).

Марапат иегерінің есімі 1 қараша күні өтетін QJ League Awards салтанатты рәсімінде жарияланады.