Freedom QJ League 2025 үздік шабуылшысы: ұзын тізімге кімдер енді

Айта кетейік, әрбір марапат қазақстандық футбол аңыздарының құрметіне аталған. Маусымның үздік шабуылшысы атағы Эдуард Сон есімімен байланысты.

Эдуард Сон – қазақстандық футболдың ардагері. Ол футболмен Қарағандының «Шахтер» клубының дайындық тобында Серік Бердалиннің қол астында айналыса бастады. 1980 жылы «Қайратқа» шақырылып, алғашқы үш маусымда қосалқы құрамда ойнады. 1983–1985 жылдары негізгі құрам сапында 31 матч өткізіп, екі гол соқты.

1987 жылы «Днепр» командасына ауысып, төрт маусым ойнады. Осы кезеңде КСРО чемпионы әрі кубок иегері атанды, еурокубоктарда да өнер көрсетті. 1991 жылы Францияға көшіп, «Газелек» пен «Перпиньян» клубтарында ойнады. 1980–1985 жылдары КСРО жасөспірімдер және жастар құрамаларында өнер көрсетті.

2023 жылы маусымның үздік шабуылшысы атанған – «Қайрат» ойыншысы Рамазан Бағдат, ал келесі жылы бұл атаққа «Тараз» шабуылшысы Нұрдаулет Орынбасар ие болды.

Биылғы маусымның ұзын тізіміне бес футболшы енді: Глеб Макридов («Шахтер»), Абылай Төлеухан («Қайрат»), Ален Пак («Астана»), Жанәлі Есенәлиев («Ордабасы») және Жәңгірхан Джанкуразов («Жас Қыран»).

Марапат иесінің есімі 1 қарашада өтетін QJ League Awards салтанатты рәсімінде жарияланады.