Freedom QJ League 2025 үздік қорғаушысы: лонг-листке кімдер енді

Еске салайық, әрбір марапат еліміздің танымал футбол қайраткерлерінің құрметіне аталған. Маусымның үздік қорғаушысына берілетін сыйлық Евгений Яровенконың есімін иеленеді.

Евгений Яровенко – кеңестік және қазақстандық футболшы, сондай-ақ Freedom QJ League сарапшысы мен амбассадоры.

Олимпиада чемпионы, КСРО-ның еңбек сіңірген спорт шебері, соңғы 50 жылдағы (1954/2003) Қазақстанның ең үздік футболшысы ретінде УЕФА-ның мерейтойлық марапатына ие болған. 17 жасында «Фосфорит» командасына қабылданып, 1981 жылы облыстың басты командасы – жамбылдық «Химиктің» ойыншысы атанды.

Екі жылдан кейін Яровенко КСРО жоғары лигасында ойнаған алматылық «Қайратқа» шақырту алды. Киевтің «Динамосына» қарсы матчта дебют жасап, көп ұзамай негізгі құрамның сенімді мүшесіне айналды. 1986 жылы команданың капитаны болып, сол жылы КСРО Олимпиадалық құрамына шақырылды.

1988 жылы Сеул Олимпиадасына қатысып, кеңес құрамасы алтын медаль иеленді. Яровенко финалда Бразилия құрамасының шабуылшысы Ромариоға қарсы ойнады. Ол – қазақстандық футбол тәрбиеленушілері арасындағы жалғыз Олимпиада чемпионы.

2023 жылы үздік қорғаушы аталымының иегері болып «Жас Қыран» ойыншысы Руслан Захаров танылған еді, ал келесі маусымда бұл марапат «Қайрат» футболшысы Әмірбек Базарбаевқа бұйырды.

Биылғы лонг-листке бес футболшы енді: Василий Леонтьев («Шахтер»), Әкежан Қалиқұлов («Қайрат»), Рамзес Рашидов («Жас Қыран»), Алихан Жексенбек («Астана») және Талант Қуаныш («Ордабасы»).

Марапат иесінің есімі 1 қарашада өтетін QJ League Awards салтанатты рәсімінде жарияланады.