Қайту

Маусымның үздік ойыншылары: Freedom QJ League U-15

Main image

Freedom QJ League U-15 турнирінің аяқталған маусымындағы үздік футболшылар мен жылдың үздік құрамасын назарларыңызға ұсынамыз.

Үздік қақпашы: Бехруз Мухсумбаев («Ордабасы»)

Бехруз 81 сейв жасап, турнирде екінші орын алды. Ол қақпаға бағытталған соққылардың 79%-ын қайтарды. Бұл – турнирдің негізгі қақпашылары арасындағы ең үздік көрсеткіш. 18 матчта 22 гол жіберіп, алты кездесуде қақпасын құрғақ сақтады.

Үздік қорғаушы: Ұлан Қорғанбай («Жас Қыран»)

Ұлан 6 нәтижелі пас беріп, турнирдің барлық қорғаушыларынан озып шықты. Сонымен қатар 2 гол соқты. Оның еншісінде 215 рет қарсылас пасын қиып, 157 рет допты қайтарып алу көрсеткіші де бар.

Үздік жартылай қорғаушы: Исмеджан Бермухамбет («Тобыл»)

Исмеджан барлық 22 матчқа қатысып, 12 гол соқты және 7 нәтижелі пас берді. Ал «Тобыл» турнирдің күміс жүлдегері атанды. Соңғы турда жартылай қорғаушы «Атлетикоға» қарсы кездесуде небәрі 11 минут ішінде хет-трик жасады. Матч 7:1 есебімен аяқталды.

Үздік шабуылшы: Алихан Айтмухамбет («Ертіс»)

Алихан 11 гол соғып, 15 нәтижелі пас берді. «Гол+пас» жүйесі бойынша одан жоғары нәтиже көрсеткен тек «Қайраттың» үш ойыншысы ғана болды. Осы нәтижелі пастардың алтауын Алихан қазан айында берді. Дәл осы кезеңде «Ертіс» қола жүлде үшін күресте «Ақтөбені» басып озды.

Ең құнды ойыншы: Абдурахим Оңғарбек («Қайрат»)

Абдурахим 20 нәтижелі пас беріп, осы маусымда Лиганың барлық ойыншыларынан озып шықты. Сонымен қатар 17 гол соқты. Осылайша, ол «Қайрат» U-15 командасының 125 голының 37-сіне тікелей үлес қосты.

Үздік сұрмерген: Абылай Тұрсын («Қайрат»)

Абылай – U-15 турнирі тарихындағы алғашқы үздік сұрмерген. Ол 20 матчта 27 гол соқты. «Қайрат» капитаны «Таразды» 11:0 есебімен жеңген кездесуде бес гол, ал «Каспийге» қарсы 12:1 есебімен аяқталған матчта тағы төрт гол соқты.

Жылдың үздік құрамасы

Қақпашы: Бехруз Мухсумбаев («Ордабасы»).
Қорғаушылар: Мадияр Надир («Қайрат»), Ұлан Қорғанбай («Жас Қыран»), Әбілмансұр Төлеген («Ертіс»).
Жартылай қорғаушылар: Алихан Айтмухамбет («Ертіс»), Абдурахим Оңғарбек («Қайрат»), Руслан Плясковский («Тобыл»), Исмеджан Бермухамбет («Тобыл»).
Шабуылшылар: Милан Надрышин («Ақтөбе»), Абылай Тұрсын («Қайрат»), Арнұр Батырбай («Шахтер» / «Тараз»).

Өткен жылдағыдай, барлық турнирлерде «Ең құнды ойыншы», «Үздік қақпашы», «Үздік қорғаушы», «Үздік жартылай қорғаушы» және «Үздік шабуылшы» аталымдарының жеңімпаздары Лиганың серіктесі Freedom Bank-тен 200 000 теңге көлемінде ақшалай сыйақы алады.