Қайту

Маусымның үздік ойыншылары: Freedom QJ League U-16

Main image

Freedom QJ League U-16 турнирінің аяқталған маусымындағы үздік футболшылар мен жылдың үздік құрамасын назарларыңызға ұсынамыз.

Үздік қақпашы: Алдияр Алдабергенов («Ақтөбе»)

Алдияр 20 матч өткізіп, 15 гол жіберді және қақпаға бағытталған соққылардың 79%-ын қайтарды. Оның қатысуымен «Ақтөбе» қорғаныс көрсеткіші бойынша «Қайраттан» кейін екінші орын алды – команда 21 гол жіберіп, 10 матчта қақпасын құрғақ сақтады. Нәтижесінде ақтөбеліктер қола жүлдеге ие болды.

Үздік қорғаушы: Бекнұр Нұрман («Қайрат»)

Бекнұр – турнирдегі ең үздік қорғаныстың ойыншысы. «Қайрат» 22 турда небәрі 5 гол жіберіп, 17 кездесуде қақпасын құрғақ сақтады. Қорғаушы 18 матчта 263 рет қарсылас пасын қиып, 6 гол соқты және 4 нәтижелі пас берді. Сонымен қатар дәл пастар саны бойынша (830) турнирде төртінші орын алды.

Үздік жартылай қорғаушы: Максим Бонет («Шахтер»)

Максим 10 гол соғып, 8 нәтижелі пас берді. Әлихан Кәріммен бірге «гол+пас» жүйесі бойынша 37 ұпай жинады. Бұл дуэт «Шахтердің» күміс жүлдеге қол жеткізуіне көмектесті. Бір жыл бұрын қарағандылық клуб осы турнирде небәрі алтыншы орын алған еді.

Үздік шабуылшы: Балахмет Әділбек («Тобыл»)

Балахмет 21 гол соқты. Бұл – «Тобылдың» барлық голдарының жартысынан астамы және турнирдегі екінші үздік көрсеткіш. Ол сұрмергендер жарысында екінші орынға тек соңғы турда көтерілді. Сол кездесуде Балахмет «Атлетико» қақпасына хет-трик жасап, командасының 3:1 есебімен жеңіске жетуіне көмектесті.

Ең құнды ойыншы: Мирон Ищенко («Атлетико»)

Мирон 20 гол соғып, 4 нәтижелі пас берді. «Гол+пас» жүйесі бойынша жинаған 24 ұпайы – турнирдегі екінші үздік көрсеткіш. «Атлетико» шабуылының көшбасшысы жарысқа алғаш қатысқан командасының төртінші орын алуына көмектесті.

Үздік сұрмерген: Дастан Рүстем («Қайрат»)

20 матчта 27 гол – U-16 турнирінің жаңа рекорды. Өткен маусымда үздік сұрмерген атану үшін 14 гол жеткілікті болған еді. Дастан «Қайсарды» 15:0 есебімен ойсырата жеңген кездесуде бірден 7 гол соқты. Ал соңғы турда оның голы «Қайрат» U-16 командасының маусымдағы 100-голы болды.

Жылдың үздік құрамасы

Қақпашы: Алдияр Алдабергенов («Ақтөбе»).

Қорғаушылар: Әділет Бораналы («Шахтер»), Бекнұр Нұрман («Қайрат»), Ришат Құрбаниязов («Ақтөбе»).

Жартылай қорғаушылар: Әлихан Кәрім («Шахтер»), Максим Бонет («Шахтер»), Расул Самаев («Атлетико»), Мансұр Еркінбек («Қайрат»).

Шабуылшылар: Дастан Рүстем («Қайрат»), Мирон Ищенко («Атлетико»), Балахмет Әділбек («Тобыл»).