Қайту

Маусымның үздік ойыншылары: Freedom QJ League W

Main image

Freedom QJ League W турнирінің аяқталған маусымындағы үздік футболшы қыздар мен жылдың үздік құрамасын назарларыңызға ұсынамыз.

Үздік қақпашы: Мария Татаринова («Ақтөбе»)

Мария 13 матч өткізіп, 43 сейв жасады және 17 гол жіберді. Турнирдің негізгі қақпашылары арасында одан сирек гол жіберген тек «Қайрат» ойыншысы Ақнұр Жақсыкелді ғана болды.

Үздік қорғаушы: Айнель Сманова («Астана»)

Айнель маусымдағы барлық 1260 минутты алаңда өткізіп, допты қайтарып алу (214) және дәл пас беру (496) көрсеткіштері бойынша турнирде көш бастады. Сонымен қатар ол 256 рет қарсылас пасын қиып, осы көрсеткіш бойынша үшінші орын алды. Қорғаушының еншісінде 2 гол мен 2 нәтижелі пас та бар.

Үздік жартылай қорғаушы: Дария Төлегенова («Шахтер»)

Дария 7 гол соғып, 3 нәтижелі пас берді. Ол гол саны бойынша да, «гол+пас» жүйесі бойынша да «Шахтердің» ең нәтижелі футболшысы атанды. Бұдан бөлек, 13 матчта 293 дәл пас жасады.

Үздік шабуылшы: Асыл Пазыл («Астана»)

Асыл 8 гол соғып, «Астананың» үздік сұрмергені атанды және 3 нәтижелі пас берді. Ал қақпаға дәл бағытталған соққылар саны бойынша (32) турнирде үшінші орын алды. Бір жыл бұрын ол Freedom QJ League W турнирінің ең құнды ойыншысы болып танылған еді.

Ең құнды ойыншы: Милена Николенко («Қайрат»)

Милена – турнирдің ең нәтижелі футболшысы. Ол 33 гол соғып, 12 нәтижелі пас берді және «гол+пас» жүйесі бойынша 45 ұпай жинады. Бұл – осы көрсеткіш бойынша екінші орында тұрған командаласы София Ягудинадан 14 ұпайға артық.

Үздік сұрмерген: Милена Николенко («Қайрат»)

14 матчта 33 гол – орта есеппен әр 36 минут сайын бір гол және ең жақын қарсыласынан екі есеге жуық артық көрсеткіш. Милена екінші жыл қатарынан турнирдің үздік сұрмергені атанып отыр. Өткен маусымда ол 10 матчта 24 гол соққан еді.

Жылдың үздік құрамасы

Қақпашы: Мария Татаринова («Ақтөбе»).

Қорғаушылар: Адия Тапай («Тобыл»), Айнель Сманова («Астана»), Елизавета Остертак («Қайрат»).

Жартылай қорғаушылар: Аруна Насирали («Ордабасы»), Дария Төлегенова («Шахтер»), Жібек Марат («Астана»), София Ягудина («Қайрат»).

Шабуылшылар: Айжан Есіркепова («Ақтөбе»), Милена Николенко («Қайрат»), Асыл Пазыл («Астана»).

Өткен жылдағыдай, барлық турнирлерде «Ең құнды ойыншы», «Үздік қақпашы», «Үздік қорғаушы», «Үздік жартылай қорғаушы» және «Үздік шабуылшы» аталымдарының жеңімпаздары Лиганың серіктесі Freedom Bank-тен 200 000 теңге көлемінде ақшалай сыйақы алады.