Чемпион мерзімінен бұрын анықтала ма? Freedom QJ League 17-турының превьюі

«Ертіс» – «Ақтөбе»

Павлодарлықтар матчқа көтеріңкі көңіл-күймен келеді: өткен турда команда елордадан үш ұпай алып қайтты (3:2). Дегенмен «Ертіс» 12 ұпаймен турнир кестесінің соңғы орнында қалып отыр.

Ал «Ақтөбенің» соңғы нәтижелері көңіл көншітпейді: бес турда небәрі төрт ұпай (бір жеңіс, бір тең ойын және үш жеңіліс). Соған қарамастан, «қызыл-ақтар» 20 ұпаймен бесінші орынды сақтап келеді және қосымша көрсеткіштер бойынша «Тобыл» мен КФФ Академиясынан алда тұр.

Бұл кездесуде көп нәрсе шешіледі, сондықтан қонақтар жеңіске жету үшін барын салады.

«Тараз» – «Тобыл»

«Тобыл» «Тараздан» небәрі бір ұпайға алда – 20 ұпайға қарсы 19.

Қостанайдағы алғашқы кездесу тартысты аяқталуымен есте қалды – алаң иелері 27-минуттан бастап есепте алда болды, алайда 80-минутта Расул Нұрманбай пенальтиден таразы басын теңестірді. Кейін футболшылар арасында жанжал туындап, нәтижесінде «Тобылдың» жартылай қорғаушысы Назар Захарченко мен оңтүстік ұжымның қақпашысы Абылай Әлімхан алаңнан қуылды.

Қазір тараздықтардың қарқыны жақсы: бес тур бойы жеңілген жоқ және осы аралықта 11 ұпай жинады. Ал қостанайлықтарға сырт алаңдағы матчтар дәстүрлі түрде қиын тиеді – сегіз кездесуде небәрі үш гол және жалғыз жеңіс (Ақтауда).

Есесіне «Тобылдың» қорғанысы Лигадағы үздік үштікте: 17 гол жіберген, бұл көрсеткіш бойынша тек «Қайрат» пен «Шахтер» ғана алда. Турнир кестесінің ортасындағы жағдай қалай өзгереді? Жақын арада білеміз.

«Астана» – «Жас Қыран»

Қонақтар үшін бұл – ұпай жоғалтуға болмайтын матч. Үшінші орында келе жатқан «Ордабасыға» дейін бес ұпай, ал маусымның аяқталуына алты тур қалды. Өткен турда Олег Трофимовтың командасы шымкенттіктерді нәтижелі ойында 5:3 есебімен жеңіп, жарысқа қайта қосылды.

Ал «Астана» маусымдағы ең сәтсіз кезеңін өткізіп жатыр: қатарынан жеті матчта жеңіс жоқ, соңғы бес турда небәрі бір ұпай. Елорда командасы 39 гол жіберді – бұдан нашар көрсеткіш тек «Ертісте» (46) және «Қайсарда» (45).

Дегенмен астаналықтардың бірінші айналымнан жақсы естелігі бар: Алматыда олар 2:1 есебімен жеңіске жеткен. Матч тағдыры қосылған уақытта шешіліп, Арсен Испанов жеңіс голын соққан еді. Енді сол жетістікті өз алаңында қайталай ала ма?

«Қайрат» – «Қайсар»

«Қайрат» маусымды мінсіз өткізіп келеді. Жексенбіде қазіргі чемпиондардың титулды мерзімінен бұрын жеңіп алу мүмкіндігі бар: егер алматылықтар «Қайсарды» жеңіп, ал «Шахтер» КФФ Академиясынан ұтылса, «сары-қаралар» мәреге бес тур қалғанда-ақ қарсыластары жете алмайтын межеге шығады.

Қызылордалықтар Алматыға екі маңызды ойыншысыз келеді: Ернар Парда («гол+пас» жүйесі бойынша 7+4) мен қорғаушы Нұрым Талғат дисквалификацияға байланысты матчты өткізіп алады. Еске салайық, бірінші айналымда «қасқырлар» өз алаңында 0:4 есебімен жеңілген.

«Каспий» – «Ордабасы»

Алматыдағы жеңілістен кейін шымкенттіктер есесін қайтаруға тырысары анық. Оның үстіне «Ордабасы» сырт алаңда «не жеңіс, не жеңіліс» қағидасымен ойнап жүр: төрт жеңіс, төрт жеңіліс және бірде-бір тең ойын жоқ.

«Каспий» де ымырасыз команда, бірақ басқа мағынада: маусымда 11 жеңіліс және небәрі бір тең ойын. Дегенмен ақтаулықтар төрт жеңісінің үшеуін өз алаңында тіркеді. Бірінші айналымдағы кездесу «Ордабасының» пайдасына 3:1 есебімен аяқталған.

Екі команда да ойыншыларынан қағылады: Асадбек Абдулхакимов («Ордабасы») пен Ерсін Орантаев («Каспий») дисквалификация өтейді.

«Шахтер» – КФФ Академиясы

Өз алаңында «Шахтер» мінсіз ойнап келеді: сегіз матч – сегіз жеңіс. Қарағандылықтар бес тең ойынның барлығын және жалғыз жеңілісін («Қайраттан») сырт алаңда өткізді.

КФФ Академиясы матчқа сәтсіз сериямен келеді – қатарынан үш жеңістен кейін «Каспийден» (1:2) және «Қайраттан» (0:2) жеңілді. Дегенмен Лиганың ең жас командасын есептен шығаруға болмайды: дәл осы ұжым үшінші орында келе жатқан «Ордабасыны» екі рет жеңді (4:3 және 2:0).

Бірінші айналымда «Шахтер» 2:0 есебімен жеңіске жетті, қос голды да Расул Акимов соқты. Осы демалыста бізді не күтіп тұр?

КФФ Академиясының маңызды ойыншысы Асхат Дүтпаев матчты өткізіп алады. Ол осыған дейін барлық 16 турға қатысқан, алайда сары қағаздарының саны шектен асты.

Fantasy QJ League: ЖИ 17-турға оңтайлы құрам ұсынды