Аз құрамда жеңіс және Көкшетаудағы екі дубль: Freedom QJ League B 15-турының қорытындысы

Кем құрамда жеті жауапсыз гол

Турдың басты оқиғасы Өскеменде болды, онда «Алтай» «Хан-Тенгриді» қабылдады. Алматы командасы 7:0 есебімен жеңіске жетті – әзірге бұл қазіргі маусымдағы ең ірі есеп.

Қонақтар матчтың басым бөлігін он ойыншымен өткізді. 13-минутқа қарай Әділжан Қайрат пен Жанәді Жұмабектің голдарының арқасында олар 2:0 есебімен алда келе жатқан, алайда 19-минутта Әсет Рахат қарсыластың айқын гол соғу мүмкіндігінен айырғаны үшін қызыл қағаз алды. Бұл «Хан-Тенгридің» ойынына әсер еткен жоқ: үзіліске дейін алматылықтар тағы екі, ал екінші таймда тағы үш гол соқты.

Қонақтар капитаны Әділжан Қайрат хет-трик жасады (1, 29 және 60-минуттар). Үзілістен кейін алаңға шыққан Даниял Мұрат дубль авторы атанды, ал Жұмабектен бөлек тағы бір голды Тимур Хван соқты.

Осы жеңістің арқасында «Хан-Тенгри» жеңісті сериясын бес матчқа дейін ұзартты және әлі де «Жеңістен» бір ғана ұпайға қалып келеді – 33 ұпайға қарсы 34. «Алтай» үшін бұл маусымдағы 11-жеңіліс болды.

«Жеңіс» бірінші орнын сақтап қалды

«Астана Аренада» «Жеңіс» «Атырауды» 4:0 есебімен жеңіп, «Хан-Тенгридің» өзін басып озуына мүмкіндік бермеді.

Матчтағы шешуші сәт 31-минутта болды – қонақтар қорғаушысы Мұхаммад Махмедин екінші сары қағазын алып, «мұнайшылар» кем құрамда қалды.

Бірінші таймның соңында Жаннұр Малтықбай есеп ашты, ал үзілістен кейін елордалық команданың басымдығы айқындала түсті. Әмірхан Абай дубль жасады (59 және 77-минуттар), ал оның голдарының арасында Нұраби Нұрлан мергендік танытты. Абай 10 матчтағы гол санын 9-ға жеткізді.

16 ұпайы бар «Атырау» жетінші орында қалды.

«Жайық» тағы да гол жібермеді

14-турдағы сүрінуге қарамастан, оралдықтар чемпиондық бәсекеде қалып отыр. Шымкентте «Жайық» «Оңтүстікті» 1:0 есебімен жеңді. Жалғыз голды 64-минутта Рами Жақсылық соқты.

31 ұпайы бар «Жайық» үшінші орында келеді және әлі де турнирдегі ең үздік қорғаныс көрсеткішіне ие: 15 турда небәрі 13 гол жіберген.

Дегенмен келесі матчта оралдықтар үздік сұрмергені Ілияс Бекмұхановсыз ойнайды: шабуылшы Шымкентте төртінші сары қағазын алып, «Қызылжарға» қарсы кездесуді өткізіп алады.

Ал «Оңтүстік» қатарынан бес тур бойы жеңіске жете алмай келеді – үш жеңіліс және екі тең ойын. Freedom QJ League B-дің екі дүркін чемпиондары 18 ұпаймен алтыншы орында тұр.

«Оқжетпестен» екі дубль

Көкшетауда «Оқжетпес» «Елімайды» 4:2 есебімен жеңді.

Қонақтар 16-минутта Алинұр Карпишановтың голымен есеп ашты, алайда үзіліске дейін Нұралы Сабыржан Даниил Малышевтің қақпасына екі рет гол соқты.

60-минутта Вадим Сайбель пенальтиді сәтті орындап, қонақтарды ойынға қайта қосқандай болды. Алайда кейін Арсен Арапов өз сөзін айтты – шабуылшы 71 және 80-минуттарда гол соғып, өзі де дубль жасап, жеңімпазға қатысты барлық сұрақты шешті.

Енді Араповтың осы маусымда 9 голы бар, ал алты нәтижелі пас берген Сабыржан турнирдің үздік ассистенттері тізімінде жеке-дара көш бастады – ол екі гол соғып қана қоймай, Арсеннің алғашқы голына да пас берді.

«Оқжетпес» әлі де төртінші орында (26 ұпай), «Жетісудан» үш ұпай алда келеді. «Елімай» (15) сегізінші орында қалды.

Петропавлдағы тартысты концовка

«Жетісу» кем құрамда ойнай жүріп, сырт алаңда «Қызылжардан» жеңісті жұлып алды.

33-минутта қонақтар капитаны Аманесен Қорғанбай есеп ашты, алайда 56-минутта Егор Лавренко пенальтиден есепті теңестірді. Бұған дейін талдықорғандықтар он ойыншымен қалған еді: Емірхан Көлбаев қызыл қағаз алды.

Соған қарамастан, жеңісті қонақтар тойлады. 89-минутта алаңға Абылай Қалдар шықты да, уақыттың аз қалғанына қарамастан, жеңіс добын соқты.

Қосылған уақыт өте тартысты өтті: ойыншылар арасындағы жанжалдан кейін төреші бірден төрт қағаз көрсетті, оның екеуі – қызыл. Қорғанбай мен «Қызылжардың» қақпашысы Аян Сембаев алаңнан мерзімінен бұрын кетіп, алаң иелеріне қосалқы қақпашыны шұғыл түрде ойынға қосуға тура келді.

23 ұпайы бар «Жетісу» бесінші орында. «Қызылжар» тоғызыншы орында қалып, әлі де лигадағы ең төмен нәтижелілік көрсеткішіне ие – 15 турда небәрі 12 гол соққан.

15-турдан кейінгі үздік сұрмерген: Жанәді Жұмабек («Хан-Тенгри», 10 гол).
15-турдан кейінгі үздік ассистент: Нұралы Сабыржан («Оқжетпес», 6 нәтижелі пас).