А Лигасының он жетінші туры аяқталды. Флагмандық турнирдің қорытындысын шығарамыз.
«Қайраттың» мерзімінен бұрын чемпион атануы кейінге қалды
Көш басындағы үш команда да өз матчтарында жеңіске жетті – жүлделі орындар үшін таластың сұлбасы барған сайын айқындала түсуде. Дегенмен бұл турда командалар мен жанкүйерлер соңғы ресми жауаптарды ала алмады.
«Қайрат» чемпиондықты мәреге бес ойын қалғанда рәсімдеу үшін қолдан келгеннің бәрін жасады – «Қайсарға» қарсы матч 9:0 есебімен аяқталды.
«Сары-қаралар» сапында бірден төрт ойыншы дубль жасады: Әлихан Жұмабек, Дәулет Орынбасар, Сұлтанәлі Әбдуәлі және Әлихан Рамазанов. Тағы бір голды Ислам Рақым соқты. Алғашқы доп матчтың екінші минутында кірсе, соңғысы 69-минутта соғылды.
Жеңістің кермек тұсы – ойын соңында Сұлтанәлі Әбдуәлінің екінші сары қағаз алуы болды. Форвард келесі турға қатыса алмайды.
«Қайраттың» жеңісінен кейін мерзімінен бұрынғы чемпиондықтың тағдыры Қарағандыдағы ойынға байланысты болды – «Шахтер» жанкүйерлеріне біраз қобалжуға тура келді. Алаң иелері КФФ Академиясының қақпасына 4-минутта-ақ гол соқты, алайда көп ұзамай Байжан Асхат өз қақпасына доп жіберіп алды – есеп теңесті.
Таблодағы тең есеп 75-минутқа дейін сақталды. Осы сәтте Дамир Юсупбеков гол соғып, қорытынды хаттамада 2:1 есебі тіркелді.
Егер «Шахтер» ұпай жоғалтқанда, команда «сары-қараларға» чемпиондықты тойлауға қосымша себеп беріп қана қоймай, «Ордабасыны» да өзіне қауіпті деңгейде жақындатып алар еді – енді «кеншілер» шымкенттіктерден бұрынғыдай алты ұпай алда келеді.
Оңтүстік командасы өз матчында «Каспийді» сырт алаңда оңайлықпен жеңген жоқ – 1:0. Ақтаудағы кездесудің тағдырын бірінші таймның соңына қарай Нұрасыл Шералы соққан жалғыз гол шешті.
Павлодардағы голдар шоуы
Турдың алғашқы ойын күні «Ертіс» пен «Ақтөбе» арасындағы кездесумен ашылды. Матч жанкүйерлерді көп голмен қуантты – екі команда қосылып тоғыз доп соқты.
«Ақтөбе» сапында Ибрахим Бауыржанов, Ашер Асхат және Аян Аманжулов дубльден жасады. Оның үстіне Бауыржанов үш нәтижелі пас берсе, Асхат екі ассисттің авторы атанды. Басқаша айтқанда, бұл үштік өте нәтижелі өнер көрсетті.
«Ертістің» үш голын да бір ойыншы – Алдияр Смағұлов соқты. Оның екеуін ойыннан, тағы біреуін 11 метрлік айып добынан енгізді.
Нәтижесінде павлодарлықтар 12 ұпаймен турнир кестесінің соңғы орнында қалып отыр. «Ақтөбе» 32 ұпаймен бесінші орында, бірақ қола жүлде үшін күресу мүмкіндігін сақтап қалды.
«Тобылдың» қиын жеңісі
Тараздағы ойын алаң иелерінің Қостанайдан келген қонақтарға 2:3 есебімен жеңілуімен аяқталды. 37-минутта «Тобылдың» жартылай қорғаушысы Роман Гаврилюк есеп ашты, алайда екінші таймда Ғалымжан Оразалиев таразы басын теңестірді.
Көп ұзамай қонақтар пенальти тебу құқығына ие болды, оны Руслан Джетенов сәтті орындады. 82-минутта Риза Жұмағұл үшінші голды соғып, Қостанай командасының басымдығын арттырды. Дегенмен қосымша уақытта «Тараз» есеп айырмасын минимумға дейін қысқартты – Ремзи Али-Оглы таблодағы соңғы нәтижені белгіледі.
Айта кетейік, алаң иелері «Тобыл» қақпасына дәл бағытталған соққы саны бойынша қарсыласынан екі есе асып түсті – 10:5. Қостанайлықтардың жеңісіне қақпашы Даниил Нұржанов тағы да елеулі үлес қосты.
«Жас Қыран» соңғы сәтте құтылды
«Астана» мен «Жас Қыран» арасындағы матч 1:1 есебімен тең аяқталды.
Көптеген көрермен соңғы минуттарға дейін басқа нәтижені күткен еді. 48-минутта Ибрахим Кумбай елордалық команданы алға шығарғаннан кейін есеп ұзақ уақыт өзгерген жоқ. Алайда қосымша уақытта алматылықтар ақыры жауап голын соқты – Нұрбол Нұрлан мергендігімен көзге түсті.
Тартысты концовкада кейбір ойыншылар эмоциясын ұстай алмады – нәтижесінде матчтан кейін «Жас Қыран» сапынан Сергей Шарунов, ал «Астанадан» Таир Дулат алаңнан қуылды. Бұған қоса, сары қағаздардың шектік санын жинауына байланысты келесі турды екі қорғаушы – «Жас Қыраннан» Дамир Күншуақ және «Астанадан» Нұралы Бегалы өткізіп алады.
Қазір «Астана» 16 ұпаймен тоғызыншы орында және «Тараздан» үш ұпайға қалып келеді. «Жас Қыран» (25) әлі де төртінші орында, алайда «Ордабасымен» (32) арадағы айырма одан әрі ұлғайды. Маусымның аяқталуына бес тур қалды.
17-турдан кейінгі үздік сұрмерген: Дәулет Орынбасар («Қайрат», 19 гол).
17-турдан кейінгі үздік ассистент: Аян Аманжулов («Ақтөбе», 8 нәтижелі пас).
.webp)
.webp)
