Freedom QJ League B турнирінің он жетінші туры қалай өткенін баяндаймыз.
Шымкенттегі ірі жеңіс
«БИИК» стадионында «Оңтүстік» «Хан-Тәңірін» 6:1 есебімен ойсырата жеңді.
Алғашында мұндай нәтижені ештеңе аңғартпаған еді: 6-минутта алматылықтардың шабуылшысы Дінмұхамед Тайлан есеп ашты. Алайда кейін алаң иелері үш минуттың ішінде ойынды төңкеріп жіберді: 21-минутта Бекзат Есіркепов, 24-минутта – Нұрдәулет Тілеулес гол соқты.
Үзілістен кейін көп ұзамай матчтағы интрига барынша азайды. 47-минутта Рауан Жұрымбетов, 48-минутта – Арда Мұхтаров мергендік танытты.
68-минутта Прохор Иванцовтың алаңнан қуылуы да алаң иелеріне кедергі келтірмеді – «Оңтүстік» азшылықта тағы екі гол соқты, ал қосымша уақытта Жұрымбетов дубль авторы атанды.
«Хан-Тәңірі» үшін бұл 7-турдан бергі алғашқы жеңіліс және қатарынан алты жеңістен тұрған серияның соңы болды. Команда турнирдегі ең нәтижелі шабуылға ие (46 гол), алайда бір кештің ішінде қорғаныстағы статистикасын едәуір нашарлатып алды (25 жіберілген гол).
«Жеңіс» бірінші орынды сақтап тұр
Чемпионат көшбасшысы Алматыдағы бәсекелесінің сүрінуін сәтті пайдаланды. Air Arena-да «Жеңіс» «Елімайды» 3:0 есебімен жеңді.
11-минутта Нұрғиса Шәріпбай есеп ашты, 69-минутта Нұраби Нұрлан басымдықты еселеді, ал қосымша уақытта Ердәулет Исмаилов қорытынды есепті белгіледі.
Енді елордалық команда соңғы турға 37 ұпаймен көшбасшы ретінде келеді – «Хан-Тәңірі» бір ұпай, «Жайық» үш ұпай қалып тұр.
«Жайық» Атырауда төрт гол жіберді
«Мұнайшылар» өз алаңында қатарынан екінші жеңісіне жетіп, Орал командасын 4:1 есебімен ұтты.
27-минутта Нұрбек Амангелді есеп ашты, ал матчтың басты қаһарманы 56-минутта алаңға шыққан Нұрали Рахмет болды – ол дубль жасады. Нұрсұлтан Жомарт та бір голды өз еншісіне жазды. Қонақтар қосымша уақытта капитан Дамир Залмұқановтың голымен ғана жауап берді.
Бұл нәтиже «Жайықтың» чемпиондық мүмкіндігіне айтарлықтай соққы болды. Титулды жеңіп алу үшін команда соңғы турда «Оқжетпесті» жеңіп қана қоймай, бірден екі бәсекелесінің ұпай жоғалтқанына үміттенуі керек.
«Қызылжар» азшылықта жеңіске жетті
Турдың ең болжап болмайтын матчы Көкшетауда өтіп, «Қызылжар» 3:2 есебімен жеңісті жұлып алды.
37-минутта Михаил Федосов қонақтарды алға шығарды, алайда үзілістен кейін «Оқжетпес» Альмерек Қарбаев пен Нұралы Сабыржанның голдарымен жауап берді. Ал 73-минутта петропавлдықтар он ойыншымен қалды – Роман Комаровский екінші сары қағазын алды.
Соған қарамастан, кездесудің тағдырын «Қызылжардың» қосалқы ойыншылары шешті: 78-минутта алаңға шыққан Нұржан Сейткереев есепті теңестірсе, матчтың соңында Кирилл Екимов жеңіс голын соқты. Ол алаңға осы голдан үш минут бұрын ғана шыққан еді.
Бұл «Қызылжардың» маусымдағы төртінші және 11-турдан бергі алғашқы жеңісі. Ал «Оқжетпес» қатарынан екінші рет жеңілгенімен, қосымша көрсеткіштер бойынша төртінші орнын сақтап қалды – олардың да, «Жетісудың» да еншісінде 26 ұпайдан.
«Алтайдың» екінші жеңісі
Турнир аутсайдері Өскеменде өз жанкүйерлерін қуантты – «Алтай» «Жетісуды» 1:0 есебімен жеңді. Жалғыз голды 36-минутта қорғаушы Дарын Сүйімбек соқты.
Павел Евтеев командасы үшін бұл маусымдағы небәрі екінші жеңіс. «Жетісу» бесінші орында қалып, «Оқжетпестен» оза алмады.
17-турдан кейінгі үздік сұрмерген: Жанади Жұмабек («Хан-Тәңірі», 12 гол).
17-турдан кейінгі үздік ассистент: Нұралы Сабыржан («Оқжетпес», 6 нәтижелі пас).
