Қыздар турнирінің өткен матчтарындағы басты оқиғаларды ұсынамыз.
«Қайрат» – чемпион!
Алматылықтар өз алаңында «Шахтерді» 13:0 есебімен ойсырата жеңіп, чемпиондықты өте әсерлі түрде рәсімдеді.
Кездесудің басты қаһарманы Милена Николенко болды. Ол 4, 27, 32, 33, 38, 65 және 88-минуттарда жеті гол соқты. София Ягудина хет-трик жасаса, Жания Махаш және алаңға қосалқы құрамнан шыққан Мөлдір Бакирова мен Айым Құрмаш бір-бір голдан соқты.
Николенконың еншісінде қазірдің өзінде 27 гол бар: ол былтырғы нәтижесінен (24 гол және маусымның үздік сұрмергені атағы) турнирдің аяқталуына бір тур қалғанда асып түсті. Келесі орындарда Миленаның командаластары София Ягудина (16) мен Жания Махаш (10) тұр.
Оксана Коханнаяның шәкірттері Лиганың әйелдер турнирін қатарынан екінші рет жеңіп отыр – еске салайық, «сары-қаралар» 2025 жылғы дебюттік маусымда да чемпион атанған еді.
«Астана» күміс жүлдені сенімді түрде иеленді
Елордалық команда өз алаңында «Ақтөбені» 3:0 есебімен жеңді. Альзия Жамбыл дубль жасады (30 және 56-минуттар), ал тағы бір голды үзілістен кейін бірден Жібек Марат соқты.
«Астана» үшінші орыннан он ұпайдан астам алда, ал «Қайраттан» бір тур қалғанда бес ұпайға қалып келеді. Сондықтан негізгі интрига тек қола жүлде үшін күресте сақталды.
«Ақтөбе» үшін бұл қатарынан екінші жеңіліс болды – «қызыл-ақтар» 17 ұпаймен бесінші орында қалып, үшінші орыннан үш ұпайға артта тұр.
«Тобылдың» жігерлі жеңісі
Турдың ең тартысты матчы Қостанайда өтті. Мұнда «Тобыл» ойын барысында есепте артта келе жатып, «Ордабасыны» 3:2 есебімен жеңді.
Қонақтар екі рет алға шықты: 11-минутта Аруна Насирали есеп ашты, бірақ 23-минутта Ясмина Мантулина таразы басын теңестірді. Дегенмен 38-минутта «Ордабасы» қайтадан алға шықты: Анель Керебек пенальтиді сәтті орындады.
Үзілістен кейін бәрін он минуттың ішінде Варвара Цойдың дублі шешті.
Осы үш ұпай Қостанай командасын үшінші орынға шығарды. «Тобыл» мен «Шахтердің» еншісінде 20 ұпайдан бар, алайда Денис Сафроновтың шәкірттері өзара кездесулердегі артықшылықтың арқасында жоғары тұр.
Соңғы турда «Тобыл» «Ақтөбемен», ал «Шахтер» «Астанамен» кездеседі.
«Ертіс» жеңілістер сериясын тоқтатты
Павлодарда «Ертіс» «Қайсарды» 2:0 есебімен жеңді. Бірінші таймның соңына қарай Полина Арланова есеп ашса, 67-минутта команда капитаны Валерия Косарева матчтың нүктесін қойды.
«Ертіс» үшін бұл 8-турдан бергі алғашқы жеңіс және қатарынан төрт жеңілістен тұрған серияның соңы болды. Қызылорда командасы үш ұпаймен турнир кестесінің соңғы орнында қалып отыр.
13-турдан кейінгі үздік сұрмерген: Милена Николенко («Қайрат», 27 гол).
13-турдан кейінгі үздік ассистент: Жания Махаш («Қайрат», 14 нәтижелі пас).
