Fantasy QJ League: Әбдуәли мен Джетенов – турдың басты қаһармандары

Еске салайық, Fantasy QJ League турнирінде әр ойын аптасының қорытындысы бойынша ең үздік құрамды жасақтаған қатысушылар COPA.KZ ұсынған 20 000 теңгелік сертификатқа ие болады.

Бұл жолы ең табысты құрамды xwle27 қолданушысы жасақтап, 86 ұпай жинады. AbilkhanAmanzhan мен zhaisan81 да дәл осындай нәтиже көрсетті, алайда маусым бойы жинаған жалпы ұпай саны бойынша жеңімпазға жол берді.

Бұл нәтижеге қол жеткізуде «Қайрат» шабуылшысы Сұлтанәлі Әбдуәли шешуші рөл атқарды. Ол «Шахтерге» қарсы сырт алаңдағы матчта (4:1) командасының барлық төрт голын соғып, фэнтези турнирінде 18 ұпай жинады.

«Тобыл» қорғаушысы Руслан Джетенов тағы 15 ұпай әкелді. Оның еншісінде бір гол мен 17 рет допты қайтарып алу бар, ал қостанайлықтар «Жас Қыранды» (2:0) қақпасына гол жібермей жеңді.

Сонымен қатар xwle27 «Ордабасы» шабуылшысы Әділбек Турдахқа капитандық таңғышты сеніп тапсыру арқылы 12 ұпай иеленді. Форвард Павлодарда пенальтиді сәтті орындады, ал шымкенттіктер «Ертісті» (5:0) ірі есеппен жеңіп, қола жүлдені мерзімінен бұрын қамтамасыз етті.



Жасанды интеллект 21-турға арнап таңдаған құрам ойын аптасының қорытындысы бойынша 63 ұпай жинады.

Маусымның жалпы есебінде Plescavica_Team (1487) көш бастап тұр. Екінші орында olegforwards (1457), ал үздік үштікті V26 (1452) түйіндейді.

Маусым жеңімпазы iPhone 17 иеленеді, ал екінші және үшінші орын алған қатысушыларға тиісінше PlayStation 5 пен Apple Watch табысталады.

Турнирге бұрын қатыспағандар да дәл қазір қосылып, апта сайын COPA.KZ сертификаты үшін таласа алады. Сонымен қатар фэнтези турнирінің Telegram желісінде жеке чаты бар. Онда жаңадан қосылғандарға көмектесуге дайын жүздеген қатысушы жиналған.

Fantasy QJ League: құрамыңды жасақтап үлгер!