Рустемнің жеті голы және рекордтың қайталануы: «Қайрат» U-16 турнирінің кейінге қалдырылған матчында «Қайсарды» ойсырата жеңді

Кездесудің басты қаһарманы Дастан Рустем болды. Жеті гол соғып, екі нәтижелі пас берген шабуылшы Мирон Ищенкодан озып, үздік сұрмергендер тізімінде көш бастады.

Үзіліске дейінгі жеті гол

Ғани Мұратбаев атындағы стадионда өткен кездесудің алғашқы 22 минутында есеп ашылған жоқ. Алайда одан кейін Денис Леденевтің шәкірттері қарсылас қақпасына голдарды бірінен соң бірін соқты. 23-минуттан 39-минутқа дейін «сары-қаралар» жеті рет мергендік танытты.

Мансур Еркінбек дубль авторы атанса, Азамат Құттымұрат бір гол соқты. Ал кездесудің басты қаһарманы Дастан Рустем төрт рет көзге түсті. Ол 28, 36, 38 және 39-минуттарда қарсылас қақпасын дәл көздеді.

Екінші таймда «Қайрат» жауапсыз тағы сегіз гол соқты. Рустем 62, 71 және 74-минуттарда мергендік танытып, бір матчтағы гол санын жетіге жеткізді. Екі нәтижелі пасын қоса есептегенде, Дастан командасының тоғыз голына тікелей үлес қосты.

Екінші таймда Қайсар Әнуарбек те дубль жасады. Омар Жұмабек пен Абылай Қайсар бір-бір голдан соқты. Ал тағы бір допты «қасқырлар» өз қақпасына бағыттап алды – Рахманберді Ертай автогол авторы атанды.

Рустем Ищенкодан озды

Бұл ойынға дейін Freedom QJ League U-16 турнирінің үздік сұрмергендер тізімінде «Атлетиконың» 14 жастағы жартылай қорғаушысы Мирон Ищенко көш бастап тұрған еді. Ол 21-турда «Ақтөбеге» қарсы матчта (3:1) хет-трик жасап, гол санын 20-ға жеткізген. Бұл Дастан Рустемнің сол кездегі көрсеткішінен бір голға артық болатын.

Енді «Қайрат» шабуылшысының еншісінде 19 матчта соғылған 26 гол бар. Ол Ищенкодан алты голға озып тұр. Үшінші орында «Тобыл» ойыншысы Балахмет Әділбек (18 гол) келеді. Маусымның аяқталуына бір ғана тур қалды.

Екі нәтижелі пас Дастанға ассистенттер көшбасшысы Алихан Каримге («Шахтер») жетуге де мүмкіндік берді. Екі футболшының да еншісінде 10 нәтижелі пастан бар. Ал «гол+пас» жүйесі бойынша Рустем 36 нәтижелі әрекет тіркеп, Ищенкодан 12 ұпайға озып кетті.

Бұған дейін Лигада бір матчта жеті гол соққан жалғыз ойыншы – «Қайраттың» шабуылшысы Милена Николенко еді. Ол қыркүйекте «Шахтерге» қарсы кездесуде (13:0) жеті рет мергендік танытқан. Ал жасөспірімдер арасындағы турнирлерде бұған дейін ешбір футболшы бір ойында бес голдан артық соқпаған.

Бір қызығы, Лиганың флагмандық турнирінде алғаш болып пента-трик жасаған футболшы да Дастан есімді «Қайрат» түлегі болатын. 2024 жылы Дастан Сәтпаев «Қайсарға» қарсы матчта (10:0) бес гол соққан еді.

15 гол айырмасымен жеңіске жету – тарихи рекорд

Бұл кездесудің нәтижесі Freedom QJ League тарихындағы ең ірі гол айырмасы бойынша рекордты қайталады.

Бұған дейін 15 гол айырмасымен жеңіске тек өткен жылғы қыздар турнирінде қол жеткізілген еді. Оның өзінде мұндай нәтиже екі рет тіркелген. Екі жағдайда да ірі есеппен жеңілген команда – «Жетісу». «Астана» талдықорғандықтарды 17:2 есебімен ұтса, «Ертіс» 16:1 есебімен басым түскен.

Жасөспірімдер арасындағы турнирлерде мұндай ірі жеңіс бұрын-соңды тіркелмеген. Сонымен қатар 15:0 есебі – Лига тарихындағы гол жібермей қол жеткізілген ең ірі жеңіс.

Турнир кестесіндегі жағдай

«Қайрат» U-16 турнирінде әлі жеңілген жоқ. Алматылықтар 21 матчта 19 рет жеңіске жетіп, екі рет тең ойнады. Команданың еншісінде 59 ұпай бар, ал соғылған және жіберілген голдар айырмасы +91-ді құрайды. Екінші орында тұрған «Шахтерден» басымдығы 11 ұпайға жеткен алматылықтар бұл кездесуге дейін-ақ чемпиондықты қамтамасыз еткен болатын.

Соңғы турда «Қайрат» сырт алаңда «Таразбен» кездеседі. Ал 6 ұпай жинаған «Қайсар» маусымды соңғы орында аяқтайды. Қызылордалықтар соңғы ойынын «Ақтөбеге» қарсы өткізеді.

Freedom QJ League U-16 үздік сұрмергені: Дастан Рустем («Қайрат», 26 гол).
Freedom QJ League U-16 үздік ассистенттері: Дастан Рустем («Қайрат») және Алихан Карим («Шахтер») – әрқайсысында 10 нәтижелі пастан.