Freedom QJ League U-17, U-16, U-15: 21-тур қалай өтті?

Freedom QJ League U-15

«Тараздың» көптен күткен жеңісі

Ақтауда «Каспий» U-15 командасы «Тараздан» келген құрдастарына есе жіберіп, турнир кестесінің соңғы орнынан көтерілу мүмкіндігін жоғалтты. Қонақтар сапынан Мадияр Серікбай, Бекасыл Рысқадыр және Нариман Нұртаза гол соқты. Алаң иелері тек Абзал Сағиевтің голымен жауап қайтарды.

Үш ұпай еншілеген тараздықтар он матчқа созылған жеңіссіз сериясын тоқтатты. Қоржынында 18 ұпайы бар команда турнир кестесінде тоғызыншы орында тұр. Енді олар бұл орыннан жоғары да көтерілмейді, төмен де түспейді.

Покерге айнала жаздаған хет-трик

«Жас Қыран» күміс жүлдені мерзімінен бұрын қамтамасыз еткен «Тобылды» 5:2 есебімен сенімді жеңді.

Алматылықтардың үздік сұрмергені Жарас Ерік үш гол соғып, осы маусымда алғаш рет бір матчта хет-трик жасады. Тіпті төрт гол соғуы да мүмкін еді. Алайда 31-минутта оның пенальтиден бағыттаған соққысын қақпашы Максим Суховертков қайтарды.

Дегенмен, жеңіске қарамастан, 33 ұпай жинаған алматылықтар жүлделі орындарға енді таласа алмайды. Қола медаль үшін «Ертіс» (37 ұпай) пен «Ақтөбе» (36 ұпай) күресін жалғастырып жатыр.

Freedom QJ League U-16

Ищенконың хет-тригі қола үшін тартысты қыздырды

Бұл турда «Ақтөбе» қола жүлдені мерзімінен бұрын қамтамасыз ете алатын еді. Ол үшін сырт алаңда «Атлетикоға» жеңілмесе болғаны. «Қызыл-ақтар» бұл мақсатқа жақын болды: 4-минутта Муслим Әлібек командасын алға шығарды.

Алайда екінші таймда ойын барысын Мирон Ищенко түбегейлі өзгертті. 14 жастағы жартылай қорғаушы небәрі 16 минут ішінде хет-трик жасап, есепті 3:1-ге жеткізді. Бұл нәтиже матч соңына дейін сақталды.

Осылайша, «Ақтөбе» үшінші орнын сақтап қалғанымен, ең жақын қуғыншысы атанған «Атлетикодан» небәрі екі ұпайға озып тұр. Сонымен қатар, белгілі бір жағдайларда «қызыл-ақтардан» үш ұпай қалып келе жатқан «Ордабасы» да қола жүлдені иелене алады.

Сондықтан Ерік Ермағамбетов шәкірттеріне алдағы «Қайсармен» кездесуде қателесуге болмайды.

Freedom QJ League U-17

«Қайрат» тізгінді өз қолына алды

U-17 чемпионатының тағдырын шешуі мүмкін маңызды матч Қарағандыда «Қайраттың» сенімді жеңісімен аяқталды. Алматылықтар 21-тур алдында чемпиондық бәсекеде көш бастап тұрған «Шахтерді» жеңді.

Тамерлан Сарсымбаев дубль авторы атанып, сұрмергендер тізімінде «Ақтөбе» ойыншысы Арсен Байжановпен теңесті. Екеуінің де еншісінде 14 голдан бар. Сарсымбаевтың екі голының арасында Ислам Рашидов та мергендігімен көзге түсті. Ал кездесудің соңында «Шахтердің» шабуылшысы Тимур Казанцев пенальтиден гол соқты. Қорытынды есеп – қонақтардың пайдасына 3:1.

Енді «сары-қаралар» «кеншілерден» бір ұпайға озып тұр. Соңғы турда «Қайрат» «Таразбен», ал «Шахтер» «Жас Қыранмен» кездеседі.

«Ақтөбе» «Ордабасының» ұпай жоғалтуын пайдаланды

Чемпионаттың аяқталуына бір тур қалғанда үздік үштікте тағы бір өзгеріс болды. Қола жүлдеге басты үміткер «Ақтөбе» атанды.

Ринат Жиембеков командасы ҚФФ академиясын 4:1 есебімен жеңді. Әлинұр Кенжин дубль жасады. Енді оның еншісінде 13 гол бар. Осылайша, ол соңғы тур алдында 14 голдан соққан командаласы Арсен Байжанов пен «Қайрат» ойыншысы Тамерлан Сарсымбаевқа бір табан жақындады.

Нәтижесінде «қызыл-ақтар» Павлодарда «Ертіспен» тең түскен «Ордабасыдан» бір ұпайға алға шықты. Бұл кездесу 1:1 есебімен аяқталды. Екі гол да матч соңына таман, 77 және 81-минуттарда соғылды.

Енді «Ақтөбе» турнир кестесінде соңғы орында тұрған «Қайсарға» қонаққа барады, ал «Ордабасы» өз алаңында «Астананы» қабылдайды.

21-турдан кейінгі үздік сұрмергендер
Freedom QJ League U-17: Арсен Байжанов («Ақтөбе») және Тамерлан Сарсымбаев («Қайрат») – 14 голдан.
Freedom QJ League U-16: Мирон Ищенко («Атлетико») – 20 гол.
Freedom QJ League U-15: Абылай Тұрсын («Қайрат») – 25 гол.

21-турдан кейінгі үздік ассистенттер
Freedom QJ League U-17: Темірлан Абжапар («Қайрат») – 10 нәтижелі пас.
Freedom QJ League U-16: Әлихан Кәрім («Шахтер») – 10 нәтижелі пас.
Freedom QJ League U-15: Абдурахим Оңғарбек («Қайрат») – 20 нәтижелі пас.