Fantasy QJ League маусымының үздіктері

Қақпашылар арасында ең көп ұпай әкелген ойыншы – «Жас Қыранның» Махмұтжан Сұңғатуллин. Оның еншісінде – 78 ұпай. Ең нәтижелі ойыны «Ордабасыға» қарсы өткен үйдегі кездесу (4:0) болды – үш сейв, пенальтиден қайтарылған соққы және «құрғақ» матч оған 11 ұпай әкелді.

Айта кетейік, QJL All Star рәсімінде Сұңғатуллин «Шахтерге» қарсы ойындағы керемет сейві үшін Игорь Шацкий атындағы марапатқа ие болды.

Қорғаушылар арасында ең көп ұпай жинаған тағы бір «Жас Қыран» ойыншысы – Рамзес Рашидов (108 ұпай). Оның ең сәтті матчы – «Ақтөбеге» қарсы үйдегі кездесу (2:0): «құрғақ» жеңіс, 17 реткі іріктеу мен ілініс және бір нәтижелі пас оған 12 ұпай әкелді.

Жартылай қорғаушылар арасында ғана емес, бүкіл ойыншылар арасында да көш бастаған – Глеб Макридов (171 ұпай). Changan MVP of the Season атағының иегері екі рет 20 ұпайдан жинаған – «Қайсармен» үйдегі және сырттағы матчтарда. Макридовтың еншісінде – 19 матчта 19 гол және 10 нәтижелі пас.

Шабуылшылар арасында ең көп ұпай жинаған – маусымның үздік сұрмергені Даулет Орынбасар (133 ұпай). Евстафий Пехлеваниди атындағы жүлде иегері «Ертіспен» және «Ақтөбемен» кездесулерде ерекше көзге түсті – әр матчта 13 ұпайдан. Барлығы 20 ойында 20 гол және 5 пас.

Fantasy QJ League маусымының чемпионы – Plescavica_Team қолданушысы. Екінші орынға Mamontov, ал үшінші орынға V26 никті ойыншы ие болды. Freedom QJ League өкілдері жүлдегерлермен жақын күндері байланысқа шығады.