Freedom QJ League төртінші туры аяқталды. Лиганың А дивизионындағы жас ерекшелігі бойынша төменгі санаттар матчтарындағы басты оқиғаларға шолу жасаймыз.
Freedom QJ League U-15: жалғыз көшбасшы қалды
Маусымдағы ең жас санаттың екі көшбасшысы – «Қайрат» пен «Тобыл» арасындағы тікелей кездесу алматылықтардың ірі жеңісімен аяқталды (8:1).
Бұл нәтижеге Абдурахим Оңғарбек (хет-трик пен ассист) пен Диас Абубакир (дубль және екі нәтижелі пас) ерекше үлес қосты. Юсуф Абдурахмоновтың еншісінде 1+1 көрсеткіші болса, Бауыржан Булатов пен Артем Тян бір-бір голдан соқты. Ал Илфрат Елакаев екі голдық пас авторы атанды.
Қонақтар сапында Болат Тайғара «абырой голын» соқты. Айта кетерлігі, оған бұл үшін небәрі жеті минут жеткілікті болды – ол алаңға 69-минутта шыққан еді.
Freedom QJ League U-16: «Ордабасы» мен «Шахтер» сүрінген жоқ
Келесі жас санатына кезек берейік. Үшінші турда «Қайрат» ұпай жоғалтқаннан кейін алға шыққан шымкенттік және қарағандылық командалар өткен уикэнд қорытындысы бойынша артықшылықтарын сақтап қалды. «Ордабасы» «Қайсарды» 3:1 есебімен жеңсе, «Шахтер» «Ақтөбеден» басым түсті – 2:1.
«Қайрат» та өз матчын жеңіспен аяқтап, «Тобыл» қақпасына жауапсыз үш гол соқты. Сондықтан көшбасшыларға босаңсуға әлі ерте. Келесі турда «сары-қаралар» өздерінің ең жақын қуғыншысы – «Атлетикоға» қарсы ойнайды.
Freedom QJ League U-17: Абжапар таңғалдыруын жалғастыруда
U-17 чемпионатында «Қайрат» пен «Шахтер» көш бастап келеді. Алматылықтар сырт алаңда «Тобылды» 7:0 есебімен тас-талқан етті.
Бұл жеңісте Темірлан Абжапар ерекше көзге түсті. Ол командасының алты голына тікелей қатысты – үш гол (біреуі пенальтиден) және үш нәтижелі пас. Осылайша «Қайрат» жартылай қорғаушысы бірден турнирдің үздік сұрмергені әрі үздік ассистенті атанды.
Ал «Шахтер» «Ақтөбені» қиындықпен жеңді – ақ-қызылдардың алаңында 2:1. Алаң иелері алғашқы таймда Арсен Байжановтың голының арқасында есеп ашқан болатын. Алайда үзілістен кейін көп ұзамай Тимур Казанцев таразы басын теңестірді.
58-минутта «кеншілер» бір ойыншысынан айырылды – Айдар Қуанышбек қарсы шабуылды тоқтатқаны үшін қызыл қағаз алды. Соған қарамастан, «Шахтер» жеңіс голын соға алды. 80-минутта Артем Лящук мергендігімен көзге түсті.
Әсерлі камбэктер
«Шахтердің» U-17 құрамасының ерік-жігер жеңісі турдағы жалғыз камбэк болған жоқ. Мысалы, қарағандылықтардың U-15 командасы «Ақтөбені» жеңе алмаса да, екі гол айырмасын қайтарды – матч 2:2 есебімен аяқталды. Қарағандылық команданың қақпашысы Асхат Амангелді тең есепті қамтамасыз еткен голдың авторы атанды.
Ал 2010 жылы туған «Жас Қыран» футболшылары әсерлі нәтиже көрсетті. 32-минутқа қарай алматылықтар өз алаңында «Ертістен» 0:2 есебімен ұтылып жатқан еді – павлодарлықтар сапында Саин Кажмұхан дубль авторы атанды. Алайда алаң иелері матч тағдырын өзгертіп жіберді: Амирхан Тұрсын екі гол соғып, ал Тимур Тугамбеков жеңіс голының авторы болды.
«Ертіс» үшін бұл қатарынан төртінші жеңіліс болды – павлодарлықтар U-17 турнирінде әлі күнге дейін ұпай еншілей алған жоқ.
4-турдан кейінгі үздік сұрмергендер
Freedom QJ League U-17: Темірлан Абжапар («Қайрат», 6 гол);
Freedom QJ League U-16: Балахмет Әділбек («Тобыл», 6 гол);
Freedom QJ League U-15: Диас Абубакир («Қайрат», 6 гол).
4-турдан кейінгі үздік ассистенттер
Freedom QJ League U-17: Темірлан Абжапар («Қайрат», 5 голдық пас);
Freedom QJ League U-16: Рамазан Келесхан («Ордабасы») және Дамир Алибаев («Тобыл», 4 голдық пастан);
Freedom QJ League U-15: Илфрат Елакаев («Қайрат») және Санжар Байдәулетов («Ақтөбе», 4 голдық пастан).
