Глеб Макридов: «Мадридтегі әр жаттығуда бар күшімді көрсетуге тырысамын»

Бұл – Лиганың ойыншыларды халықаралық деңгейде дамыту бағдарламасының бір бөлігі. Жоба Қазақстандағы Changan бренді ресми дистрибьюторы – Astana Motors құрамына кіретін Changan Kazakhstan компаниясымен бірлесіп жүзеге асырылуда.

Глеб Испаниядағы сапары, академия тәрбиеленушілері арасындағы бейімделуі және еуропалық топ-клубтағы жаттығу процесі туралы жан-жақты айтып берді.

Changan MVP of the Season сыйлығы және сапар алдындағы әсері туралы

– Мен футболды жақсы көремін, осы ойыннан ләззат аламын. Әр жаттығудан, жеңістерден, соғылған голдардан эмоция алдым. Соның нәтижесінде Changan MVP of the Season сыйлығын алып, осында келдім.

Бұл мен үшін алғашқы осындай тәжірибе болғандықтан, бәрі қалай өтетіні өте қызық болды. Көп адам қашан баратынымды, қанша уақытқа және қай командада жаттығатынымды сұрады.

Алғашқы әсерлер туралы

– «Атлетикодағы» тағылымдама – ең алдымен халықаралық тәжірибе алу мүмкіндігі. Испанияда ойыншылар қалай жаттығады, қалай ойнайды, қалай дамиды – соны көру өте маңызды.

«Атлетико» – Чемпиондар лигасында тұрақты ойнайтын, жоғары орындар үшін күресетін топ-клуб. Мұнда Антуан Гризманн сияқты аңыздар бар. Оның ойын стилі маған ұқсас – үнемі доппен ойнайды, гол соғуды және нәтижелі пас беруді жақсы көреді.

Мұнда келгенде ерекше эмоциялар сезіндім. Барлығы жоғары деңгейде, кәсіби ұйымдастырылған. Тілдік кедергілер де болды – бұл оңай емес, сондықтан тіл үйрену керек екенін түсіндім.

Клуб стадионында, киім ауыстыратын бөлмеде, алаңда және мұражайда болдық. Мұражай өте қызықты – онда көптеген кубоктар, ретро формалар және сирек жәдігерлер бар.

Стадион өте үлкен, бірақ ішіне кіргенде өте жайлы әсер қалдырады.

Жаттығу процесі және командадағы атмосфера туралы

– Жаттығу процесі біздегіге ұқсас. Жаттығуға бір сағат бұрын жиналамыз, бәрі амандасады, алдымен залда жұмыс істейміз.

Алғашқы күні U-19 командасымен жаттықтым. Үлкен айырмашылық байқамадым, бірақ олар өте жылдам, бір-екі жанасумен ойнайды.

Кейін Atletico Madrid C командасымен жаттықтым. Бұл жерде ойыншылар жасы үлкенірек, техникалық деңгейі жоғары, батыл ойнайды.

Басында қиын болды – не болып жатқанын түсіну уақыт алды. Бірақ біртіндеп үйренесің.

Жаттықтырушылар мен ойыншылар өте қолдаушы. Түсінбесең, қайта түсіндіреді. Ресейден келген ойыншылармен таныстым, кейін Украинадан келген қақпашымен де сөйлестім – ол да көмектесті.

Мұнда бір ай жаттықсаң, толық бейімделіп кетуге болады.

Өзін дамыту туралы

– Әр жаттығуда бар күшімді көрсеткім келеді, осы деңгейде ойнай алатынымды дәлелдегім келеді.

Физикалық дайындық жаттықтырушысы Евгений Горячий хабарласып, барынша еңбек етуге кеңес берді.

Таланттың өзі жеткіліксіз – көп еңбек ету керек. Егер талантты болып, бірақ жұмыс істемесең, үлкен ойыншы болу қиын.

Жас ойыншыларды дамытудағы Лиганың рөлі туралы

– Freedom QJ League жас футболшыларға үлкен көмек. Бұрын айына бір рет чемпионатқа барып, бір аптада бірнеше ойын өткізетінбіз – бұл қиын болатын.

Қазір апталық цикл бар, әр қарсыласқа дайындалуға мүмкіндік бар.

Қазақстанда мені қолдап жатқан адамдар көп екенін білемін. Бұл үлкен мотивация береді. Барлық қолдау білдірген жандарға алғыс айтамын.


Өткен маусымда Макридов «Шахтер» сапында 19 матчта 19 гол соғып, 10 нәтижелі пас берді. Сондай-ақ, ол лига тарихындағы минуттар (4502) және нәтижелі әрекеттер (39) бойынша рекорд орнатты.

Маусымаралық кезеңде ол негізгі командамен бірге жаттығып, жолдастық матчтарда екі гол соқты.