Голдар, қуаныш және жаңбыр астындағы әндер: Павлодарда Freedom QJ League W маусымы қалай ашылды

Айта кетейік, дәл осы қалада турнирдің алғашқы қадамдары жасалған болатын – өткен жылдың қыркүйегінде Mastercard компаниясымен бірге ұйымдастырылған әйелдер футболының фестиваліне екі жүзден астам жас павлодарлық қыз қатысты.

Содан бері шамамен бір жыл өтті. Лига біртіндеп кеңейіп, дамуын жалғастырып келеді. Енді міне, «Ертіс» пен «Шахтер» қыздары ашылу матчында кездесті.

Орталық стадион 4186 жанкүйерді қабылдады – бұл Қазақстандағы әйелдер клубтық футболы тарихындағы рекордтық көрсеткіш.

Стадион есіктері ойын басталардан бір жарым сағат бұрын ашылды. Айта кету керек, аренада тек павлодарлықтар ғана емес, «кеншілердің» жанкүйерлерінен құралған үлкен делегация да жиналды – қос команданың жанкүйерлері стадионға әсерлі шеру жасап кірді.

Биылғы маусымның алғашқы матчдэйі «Әйелдер футболы – жаздан да жарқын» деген ұранмен өтті. Бұл мереке жазғы фестиваль стилінде ұйымдастырылды – адамдар ашық аспан астында жайбарақат демалып, жыл мезгілінің рахатын сезінді.

Бұл атмосфера стадионның дизайны мен матч алдындағы белсенділіктерге де әсер етті. Балалар «Ұстап үлгер», «Пенальти соқ», батут, «Тор балғасы», «Сақина лақтыру», «Ханой мұнарасы» және футбол дартсы сияқты ойын-сауықтарға қатысты.



Балалар ойын-сауықпен айналысып жатқанда, ересектер фотобудкада естелікке суретке түсіп, диджей сетте би билеп, чилл-аймақта демалып, жеңіл тамақтанып, старттық ысқырықты күтіп отырды.



Changan Kazakhstan – Лиганың премиум серіктесі ретінде жеке аймаққа ие болды. Павлодарлықтар брендпен танысып, фотозонада суретке түсіп, жүлделер ұтысына қатысып, тест-драйвқа жазыла алды.



Әйелдер футболы жыл өткен сайын дамып келе жатқанына қарамастан, қоғамда әлі де кейбір таптаурын пікірлер бар. Осыны өзгерту мақсатында стадионда «ашық микрофон» аймағы ұйымдастырылды – әр жанкүйер осы тақырыптағы пікірін білдіре алды. Аймақтың дизайнында стереотиптердің абсурдтылығын көрсететін фразалар пайдаланылды: мысалы, «Әдемі голдың жынысы жоқ», «Ұзын шаш Златанға кедергі болмады» және тағы басқа.

Басқа өңірлердегі футбол сүйер қауым да бұл оқиғаның ауқымын Qazsport арқылы сезіне алды: Қазақстан тарихында алғаш рет қыздар арасындағы турнир ойыны республикалық спорт арнасында тікелей эфирде көрсетілді. Комментатор тікелей бровкадан жұмыс істеді.

Трансляция көрермендеріне арналған матч алдындағы студия ұйымдастырылды. Жүргізушілер – Бекежан Ардақұлы мен Темірлан Орынбаев. Қонақтар қатарында Freedom QJ League Қамқоршылық кеңесінің төрағасы Тимур Турлов, «Ертіс» және «Шахтер» командаларының бас бапкерлері Ксения Постовая мен Сергей Поленов, сондай-ақ журналист Мадина Асылбек болды.

Матч басталар алдында Тимур Турлов, Лига президенті Рохус Шох, ҚФФ бас хатшысы Давид Лория және Павлодар облысының әкімі Асаин Байханов сөз сөйледі.



«Freedom QJ League W алғашқы ойынын ашу – мен үшін үлкен мәртебе. Әйелдер футболы бүкіл әлемде барған сайын танымал әрі жарқын болуда. Біз алаңдарда күрес пен керемет голдарды көріп отырмыз. Біздің турнирлер – мансабын енді ғана бастап жатқан көптеген қыздарға кәсіби футболға жол ашатын жақсы алаң болады деп сенемін.

Қуаныштысы – елде толық келісім бар: мемлекет басшысы, үкімет, әкімдіктер балалар спортын қолдайды. Біз де бұдан шет қалмаймыз. Жүйелі жұмыс пен ұзақ мерзімді инвестициялар болашақта бәсекеге қабілетті, кәсіби, адал әрі әдемі футболды қалыптастырады деп сенемін», – деді Тимур Русланұлы.

Футболшы қыздарды алаңға оларды барынша қолдайтын – аналар алып шықты.





Таблодағы үлкен экранда әр футболшы жеке-жеке аталып, Қазақстанның мемлекеттік әнұраны шырқалды. Осылайша Freedom QJ League W-нің дебюттік маусымындағы алғашқы доп соғылды.

Матч толықтай «Ертістің» бақылауында өтті және 5:1 есебімен аяқталды. 17-минутта Елизавета Медведева есеп ашты, одан кейін Аружан Оспанова мен Айсана Ахмедиян дубль жасады. Қонақтар сапынан Саида Дюсембаева бір голмен жауап қатты.

Оспанованың алғашқы голын ерекше атап өткен жөн – 16 жастағы жартылай қорғаушы алыстан қақпаның тоғыздығын дәл көздеді.



Бұл гол расында да «әдемі голдың жынысы жоқ» екенін дәлелдегендей және Mastercard-тың I турдағы үздік голы жүлдесіне лайық үміткер атанды. Айта кетейік, Лиганың серіктесі әйелдер спортына – әсіресе футболға – ерекше көңіл бөледі.

«Сезімімді сөзбен жеткізу мүмкін емес. Матч алдында қатты уайымдадым, бірақ бапкердің нұсқауларының арқасында екі гол соға алдым. Командама үлкен рақмет», – деді Аружан матчтан кейін, Freedom QJ League W алғашқы ойыны жоғары деңгейде өткенін атап өтіп.

Тайм арасындағы үзілісте Changan Kazakhstan компаниясымен бірлесіп ұйымдастырылған Dance Cam LED экранда іске қосылды – кадрға түскен жанкүйерлер өз билеу шеберлігін көрсетті.

Ойынның екінші жартысында жаңбыр жауып кетті, бірақ алаңда қызу күрес жалғасып жатты – ауа райы керісінше ерекше атмосфера сыйлады.



Матч аяқталған соң сахнаға Мирас Жүгүнісов шықты. Көрермендер батыс трибунаның шатыр астынан шығып, сахнаға жақындап, сүйікті әндерін қосылып айтып, билей бастады. Хэдлайнер «Зымыран» атты басты хитімен қатар бірнеше ән орындады.





Концерт соңында құнды жүлделер ойнатылды – үш бақытты жан iPhone, AirPods және Galaxy Tab планшетін ұтып алды.

Freedom QJ League W алғашқы маусымына 8 команда қатысуда – бұл шамамен 200 қыз футболшысы. Екінші тур алдағы демалыста өтеді.