Маусым басталды! Freedom QJ League W 1-турына шолу

Павлодардағы мереке

Ашылу матчы керемет өтті – 4 186 павлодарлықтар сенбі кешіндегі жарқын атмосфераға куә болды. Екінші таймда жаңбыр жауа бастағанына қарамастан, жанкүйерлер соңына дейін футболшы қыздарды қолдады, ал финалдық ысқырықтан кейін сахнада өнер көрсеткен Мирас Жүгінісов жанкүйерлерге жылу сыйлады.
Ойынның өзіне келсек, «Ертіс» 5:1 есебімен сенімді жеңіске жетті. Есепті 17-минутта Елизавета Медведева ашты, кейін Аружан Оспанова мен Айсана Ахмедиян дубль жасады.

«Қайраттың» әсерлі бастамасы

«Қайрат» қыздары «Жетісуды» ойсырата жеңді – талдықорғандықтар қарсыластың он бір соққысына жауап қайтара алмады. «Сары-қара» сапында үш ойыншы бірден хет-трик авторы атанды: Дарья Цай, Милена Николенко және София Ягудина. Сонымен қатар Жания Махаш пен Айя Муттари бір-бір голдан салды.

Асыл Пазыл – 1+1!

«Астана» өз алаңында «Тобылды» 2:0 есебімен жеңді. Өткен жылғы 2008–2009 жылғы қыздар арасындағы ЧРК-ның үздік сұрмергені Асыл Пазыл жаңа маусымда да жарқырай бастады – 31-минутта гол, ал 76-минутта Жібек Маратқа нәтижелі пас берді.

Айта кетейік, «Тобыл» соңғы ширекті аз құрамда өткізді: 68-минутта Замира Абдрахманова қарсыласты гол салуға кедергі жасағаны үшін қызыл қағаз алды, ал 86-минутта Дина Күкіль екінші сары қағазбен алаңнан қуылды.
Матчтағы символдық алғашқы соққыны Қазақстан құрамасының қорғаушысы Абзал Бейсебеков пен актер Ансар Ілиясов жасады.

«Ордабасы» сенімді бастады

Өткен маусымда 2008–2009 жылғы қыздар арасындағы ЧРК-ны ұтқан «Ордабасы» биыл Freedom QJ League-ге айтарлықтай жаңартылған құраммен қосылды – алайда команда жоғары деңгейдегі ойын көрсетуге дайын екенін дәлелдеді.

Шымкенттік команда «Ақтөбенің» қақпасына жауапсыз үш гол соқты: Диана Ситникова 28 және 86-минуттарда дубль жасады, ал 55-минутта Балнұр Ергешбек көзге түсті.