Лига клубтарының жаттықтырушылары мен қызметкерлеріне арналған маусым алдындағы оқыту қалай өтті

Өткен жылдағыдай, оқу екі бөлек бағытқа бөлінді – командалардың жаттықтырушыларына және футбол орталықтарының пресс- және маркетинг қызметкерлеріне арналған. Бірінші бағыттағы сабақтарды Лиганың спорттық-аналитикалық блогының сарапшылары, ал екіншісін медиа және маркетинг блогының мамандары жүргізді.

Сонымен қатар, екі бағыттың бағдарламасына ортақ тақырыптар да енгізілді. Атап айтқанда, ССБ, жарыстарды ұйымдастыру және өткізу блогы, сондай-ақ медиа және маркетинг блогы басшылары – Бауыржан Сағындық, Қуандық Ермекбаев және Антон Лысяк – қатысқан кіріспе баяндамалар клуб қызметкерлеріне алдағы маусымдағы негізгі процестер туралы жалпы түсінік беруге бағытталды.

Спорттық-аналитикалық блоктың бағыты Лига сарапшыларының шолу дәрістерін қамтыды.

Мәселен, Тамара Ахметали спорт психологының рөлінің маңыздылығы туралы айтты. Еске салсақ, өткен маусымнан бастап Freedom QJ League А лигасында өнер көрсететін барлық командалар құрамында спорттық психология мамандары болуы міндетті. Ең үздік психолог үшін QJL Awards жыл сайынғы марапаттау рәсімі аясында жеке сыйлық қарастырылған.

Сондай-ақ, аналитикалық бөлім мамандары FF Manager цифрлық платформасы және Freedom Telecom мен Big Bro компанияларымен бірлесіп, жаттығу және жарыс үдерісіне «ақылды» камераларды енгізу жобасы туралы презентациялар жасады.

Өткен маусымда іске қосылған «Болашақ ойыншысы» және «Болашақ бапкері» жобалары биыл да жалғасады. Бұл бағдарламалар талантты футболшылар мен мамандарды жеке қолдауға бағытталған. Осы бағдарламалар бойынша кіріспе бөлімді Алексей Щиголев пен Александр Князев өткізді.

Сондай-ақ, Жанна Мальгаждарова Freedom QJ League W маусымына арналған ССБ мақсаттары мен міндеттері туралы баяндады.

Жаттықтырушыларға арналған кіріспе дәріске Евгений Яровенко да қатысты, ал Лиганың атқарушы директорының орынбасары Юрий Воропаев мамандарға цифрлық құралдармен жұмыс істеу ерекшеліктерін түсіндіріп, сұрақтарға жауап берді.



Екінші бағыт аясында медиа-маркетинг үйлестірушісі Асанали Ашимов маусым регламентінің талаптары, маркетологтар мен пресс-қызметтер арасындағы чемпионат және ата-аналар комитеті туралы айтты. Ал Лиганың бұрынғы SMM-менеджері Асем Ахмет (қазіргі таңда «Шахтер» клубында осы бағыттың жетекшісі) жасөспірімдер футболында әлеуметтік желілерді жүргізудің ерекшеліктерімен бөлісті.

Серіктестермен жұмыс жөніндегі менеджер Даниил Пичкарев Freedom Bank-пен бірлескен жас футболшыларды қолдау бағдарламасының қалай жұмыс істейтінін түсіндірді. Еске салсақ, Лига матчтарында алаңда өткізген әрбір минут үшін кобрендинг карталарының иелері Freedom инвестициялық валютасында 75 теңге бонус алады. Бұл қаражатты сатып алуларға, аударымдарға, байланыс қызметтерін төлеуге және басқа да қажеттіліктерге пайдалануға болады.

Бағдарламада шақырылған спикерлердің де баяндамалары болды. Николай Прилуцкий (futsalkazakhstan) футзалды медиада дамыту мысалында спорттық медианы дамыту құралдары туралы айтып берсе, Okori Group компаниясының бренд-тәжірибе және арнайы жобалар бағытының жетекшісі Ксения Орлова «Неліктен брендтерге клубтармен жұмыс істеу қызықты?» тақырыбында дәріс оқыды.

Медиа-маркетинг бағыты интерактив форматта аяқталды – қатысушылар командаларға бөлініп, теориялық білімдерін тәжірибеде қолданды. Төрт сарапшыдан құралған қазылар алқасы үздік үш топты анықтап, оларға медиа-маркетинг чемпионаты аясында бонус ұпайларын берді.