Қазақстан WU-17 құрамасы – Еуро іріктеуінің А лигасында!

Даниловград қаласында өткен матч Юлия Мамонованың шәкірттерінің 4:1 есебімен жеңісімен аяқталды. Ботагөз Жұмажанова дубль авторы атанса, Софья Ягудина мен Балжан Төлеміс бір-бір голдан соқты.

Бұған дейін қазақстандықтар Молдовамен 2:2 есебімен тең түскен болатын. Осылайша, құраманың еншісінде төрт ұпай жиналып, бұл нәтиже Еуро-2026/2027 іріктеуінің А лигасына шығуға мүмкіндік берді.

Айта кетейік, сәуір айындағы матчтарға Қазақстан WU-17 құрамасына Лигада тәжірибесі бар 23 футболшы шақырылды. Олардың қатарында Ягудина, Төлеміс және Молдова қақпасына гол соққан Жания Махаш бар.