U-18 командаларының алдағы матчтарынан не күтуге болатынын талдаймыз.
«Ертіс» – «Жас Қыран»
«Ертіс» сегіз ұпаймен турнир кестесінің соңғы сатысында келеді – бір қызығы, павлодарлықтар барлық ұпайын өз алаңында жинаған. Үйдегі және сырттағы доп айырмасында да айқын контраст бар: Павлодарда – 9:10, қонақта – 5:33. Мұның бәрі аутсайдер үшін өз алаңы факторының ерекше маңызды артықшылық екенін көрсетеді.
Ал «Жас Қыран» өткен турда үш жеңілістен тұратын сериясын тоқтатып, өз алаңында «Қайсарды» 3:1 есебімен жеңді. Қазір алматылықтар 20 ұпаймен төртінші орында.
Еске салайық, бірінші айналымда «Жас Қыран» «Ертісті» 4:1 есебімен жеңген. Қарымта матчта алаң иелеріне Тимур Титаренко көмектесе алмайды – маусымда үш гол соққан қорғаушы өткен турда алаңнан қуылды.
«Тараз» – «Астана»
Турнир кестесіндегі тікелей көршілер кездеседі: екі командада да 15 ұпайдан және көрсеткіштері де бірдей – төрт жеңіс, үш тең ойын, жеті жеңіліс. «Астана» сегізінші, «Тараз» тоғызыншы орында.
Алайда командалардың қазіргі формасы әртүрлі. Оңтүстік ұжымы матчқа қатарынан екі жеңіспен келеді, соңғысы Павлодарда тіркелді. Ал елордалықтар бес турдан бері жеңіске жете алмай жүр – екі тең ойын және үш жеңіліс.
«Тараз» өз алаңындағы ойындарға айтарлықтай тәуелді: 15 ұпайдың 11-і үйде жиналған. Ал «Астананың» сырт алаңдағы нәтижелілігі турнирдегі ең төмен көрсеткіштердің бірі – жеті матчта небәрі алты гол. Дегенмен елордада өткен алғашқы кездесуде «Астана» 3:1 есебімен жеңіске жеткен.
Алаң иелерінің шабуылдағы басты үміті – Расул Нұрманбай: сегіз гол (оның төртеуі пенальтиден) және екі нәтижелі пас, сұрмергендер тізімінде бесінші орын. Қонақтар сапында бес нәтижелі пас берген Амандық Хамидуллинді атап өтуге болады.
«Қайрат» – «Тобыл»
«Қайрат» маусымды бірде-бір сүрінусіз өткізіп келеді: 14 матчта 14 жеңіс, 63 гол және небәрі 5 жіберілген доп. Ең жақын қуғыншысы «Шахтерден» 11 ұпайға алда.
Бір қызығы, бірінші айналымда көшбасшыға ең көп қиындық тудырған команда дәл осы «Тобыл» болды. Қостанайда «сары-қаралар» небәрі 1:0 есебімен жеңді – бұл маусымдағы «Қайрат» үш голдан аз соққан жалғыз матч.
Қостанайлықтар – турнирдегі ең ерекше командалардың бірі: жетінші орын, 19 ұпай және 14:14 есебіндегі нөлдік доп айырмасы. Еске салайық, Даниил Нұржанов негізгі құрамда тұрақты ойнайтын қақпашылар арасында сейв пайызы бойынша көш бастап тұр – 81%.
Ал шабуылда жағдай басқаша: «Тобыл» сырт алаңдағы жеті матчта небәрі үш гол соқты. Қарсы бетте – Дәулет Орынбасар (17+4) мен Роман Черноморец (11+3), чемпионаттың бірінші және үшінші сұрмергендері. Қонақтардың қорғанысы төтеп бере ала ма?
«Ордабасы» – «Қайсар»
«Ордабасы» матчқа өзі үшін сирек болатын сәтсіздіктен кейін келеді: өткен турда шымкенттіктер Академия КФФ-ға 0:2 есебімен есе жіберіп, қатарынан бес жеңістен тұратын сериясын тоқтатты. Соған қарамастан үшінші орынды сақтап қалды. Ал өз алаңында оңтүстік ұжымы ұпайды сирек жоғалтады – төрт жеңіс және екі тең ойын.
«Қайсар» болса, қатарынан үш матчта жеңіліп, 12 ұпаймен оныншы орында келеді. Қызылордалықтар жеті сырт алаң ойынында тек бір рет жеңіске жетіп, 20 гол жіберген. «Қасқырлардың» шабуылы негізінен екі футболшыға тәуелді: Мәди Жеңісұлы (6 гол және бір нәтижелі пас) мен Ернар Парда (5+4) команда голдарының жартысынан астамын өз есептеріне жазды.
Қызылордадағы алғашқы кездесуде «Ордабасы» 4:1 есебімен жеңіске жетті. Қарымта матчта алаң иелеріне Диярбек Әбдіразақов көмектесе алмайды – жартылай қорғаушы сары қағаздар лимитінен асты. Есесіне Әділбек Тұрдах сапта. Ол бір мезетте турнирдің үздік бес сұрмергені мен үздік бес ассистентінің қатарына кіреді (9+5).
«Шахтер» – «Ақтөбе»
Қарағандылықтар өз алаңында өте сенімді ойнап жүр: «кеншілер» үйдегі жеті матчтың барлығында жеңіске жетіп, небәрі бір гол жіберді – оны «Каспий» соққан.
«Ақтөбе» – қарағандылықтармен тең ойнай алған төрт команданың бірі: Ақтөбедегі алғашқы кездесу 1:1 есебімен аяқталды. Қазір «қызыл-ақтар» 19 ұпаймен алтыншы орында, алайда өткен турда өз алаңында «Қайратқа» 0:4 есебімен ірі жеңілді.
Алаң иелеріне Даниял Назаров көмектесе алмайды: жартылай қорғаушы қызыл қағаз үшін дисквалификация өтеп жатыр. «Шахтердің» басты қаруы – әрине, чемпионаттың екінші сұрмергені Расул Әкімов. Оның еншісінде 13 гол және 4 нәтижелі пас бар.
Қонақтар сапында турнирдің үздік ассистенті Аян Аманжұлов (5+7), сондай-ақ небәрі он матчта жеті гол соққан Бикжан Жанаев ерекшеленеді. Fantasy QJ League құрамын жасақтағанда екеуін де ескерген жөн.
«Каспий» – Академия КФФ
Академия КФФ матчқа қатарынан үш жеңіспен келеді. Соңғы турда команда өз алаңында «Ордабасыны» 2:0 есебімен жеңді. Флагмандық турнирдің ең жас командасы 20 ұпай жинап, бұл көрсеткіш бойынша «Жас Қыранмен» теңесті және кестеде бесінші орында тұр.
«Каспий» өткен турда маусымда алғаш рет тең ойнады: Қостанайдағы матчқа дейін (1:1) ақтаулықтардың еншісінде тек жеңістер мен жеңілістер болған. 10 ұпаймен команда он бірінші орында келеді.
Дегенмен «Каспий» сенсация жасай алатынын көрсетті – елордада «Астананы» 5:1 есебімен ойсырата жеңуі маусымның ең күтпеген нәтижелерінің бірі болып қала береді.
Алғашқы кездесуде Академия КФФ 4:0 есебімен жеңіске жетті – бұл «Каспийдің» маусымдағы ең ірі жеңілісі. Ақтаулықтар BS Arena-да қарымта қайтара ала ма?
