Қазақстан U-17 құрамасы Даму кубогында Минск құрамасын жеңді

Топтық кезеңдегі алғашқы матчта Бауыржан Сағындық шәкірттері Минск құрамасымен кездесті. Беларусь астанасында өткен ойын 3:1 есебімен қазақстандық жас футболшылардың пайдасына аяқталды. Дигдар Омаров дубль авторы атанса, Ислам Рақым пенальтиді сәтті орындады.

Ертең Қазақстан құрамасы Беларусь U-17 командасымен, ал 21 ақпанда Тәжікстан құрамасының құрдастарымен кездеседі.

Еске сала кетейік, құраманың тізіміне енген футболшылардың басым бөлігі Freedom QJ League жарыстарында өнер көрсеткен. Команданың аға жаттықтырушысы – жуырда Лиганың спорттық-сараптамалық бөлімін басқарған Бауыржан Сағындық.

«Жақсы эмоциялар алдық және алдағы уақытта қай бағытта жұмыс істеу керектігі жөнінде көп ақпарат жинадық. Нені жақсарту қажет екенін көрдік. Жалпы алғанда, жинақы әрі үйлесімді әрекет еттік. Аздап коммуникация жетіспеді, себебі кейбір ойыншылар қаралымда жүр.

Жалпы нәтижеге көңіліміз толады. Ертең Беларусь құрамасымен ойын бар, сондықтан дайындықты жалғастырамыз, белгілі бір ротация жасаймыз. Барлығы сапта болып, жақсы дайындалады деп үміттенеміз», – деді матчтан кейін Бауыржан Сағындық.