Қазақстан U-17 құрамасы Даму кубогында Беларусь құрамасына есе жіберді

Бауыржан Сағындық шәкірттері турнир қожайындары – Беларусь U-17 құрамасына 0:2 есебімен жол берді.

«Ойын үшін қарсылас командаға алғыс айтқым келеді, жеңістерімен құттықтаймын. Сондай-ақ өз командамды да атап өткім келеді. Қазір – маусымаралық кезең, жігіттер клубтарында дайындықты енді ғана бастады, қарқынды ойын ырғағына әлі толық бейімделген жоқ. Біз бұл турнирде осындай сапалы матчтар өткізу арқылы стратегиямызда не жұмыс істейтінін, не жұмыс істемейтінін саралап жатырмыз. Сонымен қатар, турнир барысында бағалағымыз келетін жақын резервіміз бар.

Жігіттер алғашқы 60 минутта жақсы қарсылық көрсетті, алайда ойын соңында зейін жоғалтып алды. Есепті теңестіруге тырысып, қауіпті қарсы шабуылдарға мүмкіндік бердік», – деді Бауыржан Сағындық.

Ертең қазақстандықтар Тәжікстан U-17 құрамасымен кездеседі.

Еске салайық, ұлттық құраманың тізіміне енген футболшылардың басым бөлігі Freedom QJ League турнирінде өнер көрсеткен. Қаңтар айында команданың аға жаттықтырушысы Бауыржан Сағындық Лиганың спорттық-сараптамалық бөлімінің жетекшісі болып тағайындалды. Бұған дейін ол сарапшы қызметін атқарған.