Макридов «Атлетикода»: қалай өтті

Еске салайық, Қарағандының «Шахтер» клубының жас ойыншысы өткен маусым қорытындысы бойынша Changan MVP of the Season жүлдесін жеңіп алып, мадридтік «Атлетико» базасында бір апталық оқу-жаттығу жиынынан өтті.

Бұл тағылымдама Лига ойыншыларын халықаралық деңгейде дамыту бағдарламасы аясында, Қазақстандағы Changan брендінің ресми дистрибьюторы – Changan Kazakhstan (Astana Motors құрамында) компаниясымен бірлесіп ұйымдастырылды.

Жаттығу бағдарламасы таңертеңгі командалық жаттығулар мен кешкі жеке дайындықтарды қамтыды – жалпы алғанда Глеб сегіз жаттығу сессиясына қатысты. Сонымен қатар мәдени бағдарлама да қарастырылды: қазақстандық футболшы әйгілі «Метрополитано» стадионында болып, клубтың бай экспонаттарға толы мұражайын аралады.

Айта кетерлігі, бастапқыда Atletico Juvenil A (U-19) құрамында жаттығуды бастаған Макридов көп ұзамай испан клубының жастар командасы – Atletico Madrid C құрамына ауыстырылды.

«Атлетикодағы» тағылымдама – бұл ең алдымен халықаралық тәжірибе жинау мүмкіндігі. Испанияда адамдар қалай жаттығады, қалай ойнайды, қалай дамиды, олардың күнделікті өмірі қалай ұйымдастырылғанын көру – өте маңызды», – деді Глеб Лига сайтына берген сұхбатында.