Макридов – Freedom QJ League тарихындағы ең нәтижелі ойыншы!

Кездесудің басты қаһарманы – Глеб Макридов. «Тау-кеншілердің» джокері хет-трик жасап, бір голдық пас берді. Сонымен қатар, ол ұзақ күткен тарихи жетістікке қол жеткізді.

Freedom QJ League үшінші және соңғы маусымын өткізіп жатқан Макридов енді лиганың басты турнирінде жалпы есепте 38 ұпай жинады (26 гол + 12 ассист). Осы көрсеткішпен ол Дастан Сатпаевтың (36 ұпай) рекордын жаңартты.

Сондай-ақ, Глеб гол саны бойынша да Сатпаевты қуып жетті – екеуінде де 26 голдан бар. Дегенмен, «Қайрат» шабуылшысының бұл нәтижеге жетуіне 28 матч жеткілікті болса, «Шахтер» жартылай қорғаушысы, маусымның ең көп минут ойнаған футболшысы ретінде, бұл межеге 52 ойында жетті. Макридовтың жеке көшбасшы атануына әлі екі ойын бар.

Ал лиганың басты турнирінде ең көп нәтижелі пас берген ойыншы – «Қайраттың» өкілі Данияр Ташпулатов (16 ассист). Оған жақын көрсеткіштер «сары-қаралар» жартылай қорғаушылары Абылай Төлеуханның (14) және Азамат Тұяқбаевтың (13) еншісінде. Макридовтың пас саны – 12.

Егер лиганың барлық турнирлерін ескерсек, «Қайрат» ойыншысы Даулет Орынбасар жеке көшбасшы болып саналады – 35 матчта 45 гол және 19 ассист. Ал ең үздік ассистент – алматылық клубтың жартылай қорғаушысы Жания Махаш (23 нәтижелі пас).