«Қайрат» пен «Атырау» ұпай бөлісті, «Ертіс» қиын жағдайда: Freedom QJ League ХХ турының басты оқиғалары

Алматыдағы сенсация

Чемпиондығын мерзімінен бұрын қамтамасыз еткен «Қайрат» күтпеген жерден ұпай жоғалтты. «Атыраумен» өткен кездесуде алаң иелері 38-минутта есеп ашқан болатын – Данил Соболев Аламгир Смаковтың пасын нәтижелі соққыға айналдырды. Алайда екінші таймда қонақтар таразы басын теңестірді: Бақдәулет Марат ассист беріп, Дінмұхаммед Бағытжан гол соқты.

Ойын осы есеппен аяқталды – және «мұнайшылар» «Қайраттан» ұпай алған үшінші команда атанды. Бұған дейін алматылықтар екі рет «Жас Қыранмен» және бір рет «Каспиймен» тең түскен еді.

«Шахтер» мен «Астана» іркілмеді

Қарағандылықтар Қызылордада «Қайсарды» тас-талқан етті – 6:0. Глеб Макридов хет-трик жасап, тағы бір нәтижелі пас берді. Бұл көрсеткіш оған лиганың жаңа тарихи рекордсмені атануға мүмкіндік берді («гол+пас» жүйесі бойынша). Сондай-ақ Василий Леонтьев, Егор Пущин және Мирас Қуат бір-бір голдан соқты.

«Астана» да өз матчында ірі жеңіске жетті – «Тобылды» 5:1 есебімен тізе бүктірді. Ален Пак хет-трик авторы атанса, тағы екі голды Максат Абраев пен Асланбек Марат соқты. Қостанайлықтардың жалғыз голын Жанарыс Оспан соқты. Айта кетерлігі, елордалықтар 73-минуттан бастап бір ойыншымен ойнады – Мансұр Алихан дөрекі ойыны үшін алаңнан қуылды.

20-турдан кейін «Астана» мен «Шахтерде» 36 ұпайдан бар, қосымша көрсеткіштер бойынша елордалық клуб үшінші орында тұр.

«Жас Қыранның» ауыр жеңісі

Алматылық «Жас Қыран» Ақтауда «Каспийді» жеңді. Бірақ үш ұпай оңайлықпен келген жоқ – 84-минутқа дейін есеп ашылмады. Тек соңына қарай Арлан Жангазы есепті ашып, командасын алға шығарды. Ал қосымша уақытта Арафат Валиев есепті 2:0-ге жеткізді.

Бұл жеңіс «Жас Қыранға» турнирлік кестеде екінші орнын сақтап қалуға мүмкіндік берді. Алайда алдағы турда олар үшін маңызды сынақ күтіп тұр — қарсылас «Ертіс».

«Ертіс» – медаль жарысындағы аутсайдер

Павлодарлық команданың жағдайы турнирлік кестенің жоғарғы бөлігінде ең қиындарының бірі. «Ертіс» өз алаңында «Ордабасыға» 1:2 есебімен есе жіберді. Қонақтар сапынан Ахан Серік есеп ашса, Әбіллмансұр Қасымтай таразы басын теңестірді. Бірақ шешуші сәтте қорғаныс ойыншысы Абдурахман Орумбаев оңтүстіктерге жеңіс сыйлады.

Павлодарлықтар қазір үшінші орыннан төрт ұпай артта қалып отыр – қалған екі турда жағдайды түзету оңай болмайды.

«Тараз» – екінші алтылықтың көшбасшысы

«Тараз» қатарынан үшінші рет жеңіске жетіп, «Ақтөбенің» жетінші орынға таласу үмітін үзді. Матчтағы жалғыз голдың авторы – Тілеуқабыл Қанатбек.

Бұл жеңіс, сондай-ақ «Ертістің» сәтсіздігі оңтүстіктерге алғашқы алтылыққа кіруге мүмкіндік қалдырды – павлодарлықтардан бар болғаны төрт ұпайға ғана қалып отыр.