Freedom QJ League B: маусым қорытындылары

Чемпиондық атақ «Онтүстікке» бұйырды. Айта кетсек, бұл – 2008 жылы туған ойыншылар үшін екінші титул: өткен маусымда олар Freedom QJ League U17 B турнирінде топ жарған еді. Маусым барысында шымкенттіктерді тек бір команда – «Алтай» жеңе алды. Ал «Қызылжар», «Елімай», КФФ академиясы және «Хан-Тәңірі» клубтары чемпиондармен тең ойнаған.

Күміс жүлдені КФФ академиясының жас футболшылары иеленді – бұл команданың ойыншылары өз қарсыластарынан екі жас кіші екенін атап өткен жөн. Қола медаль иегерлері – көкшетаулық «Оқжетпес».

Турнирдің үздік сұрмергені – «Онтүстіктің» шабуылшысы Алихан Али. Ол 17 матчта 23 гол соғып, қосымша 7 нәтижелі пас беріп, «гол+пас» жүйесі бойынша маусымның ең тиімді ойыншысы атанды. Тағы бір қызық дерек: Али қатысқан әр ойында гол не паспен көзге түскен, тек соңғы турда ғана алаңға шыққан жоқ.

Маусымның үздік ассистенті атағын екі ойыншы бөлісті – Алан Камар («Онтүстік») және Тамирлан Қалымжанов («Оқжетпес»), екеуінде де 10 нәтижелі пас. Қақпашылар арасында Артем Панца («Онтүстік») көш бастады – 13 матчтың алтауында қақпасын «құрғақ» сақтаған. Ең көп сэйв жасағандар – Мукагали Тамабек («Хан-Тәңірі») және Алихан Темірхан («Елімай»), екеуінде де 76 сэйв.

Маусымдағы ең нәтижелі кездесулер: «Хан-Тәңірі» – «Онтүстік» (11-тур, 5:5) және «Онтүстік» – «Елімай» (17-тур, 9:1). Тек бір ғана ойын 0:0 есебімен аяқталды – ол бірінші турдағы «Жетісу» мен «Ұлытау» арасындағы матч.